La llingua asturiana en Bizcaya

  

La llingua asturiana en Bizcaya

Los nicios del romance asturianu na actual provincia de Bizcaya hai que referilos al territoriu al occidente del ríu Nervión conocíu como Les Encartaciones.

Esti territoriu pertenez a l’antigua Autrigonia, habitada por un pueblu celta (non bascu) y fuertemente romanizáu como yeren los autrigones. Dende’l sieglu VIII pertenez al Reinu d’Asturies qu’entama una política de repueblación cola fundación de conventos y allugamientos dende Alfonsu I qu’afitaron la consolidación d’esti territoriu oriental del reinu y qu’inda conserva los sos nomes asturianos: Sopuerta, Carranza y Valmaçeda. Créyese que’l territoriu ente’l Nervión y el Deba pertenecía al condáu asturianu d’Álaba y ye nel sieglu XI cuando surde’l señoríu de Bizcaya, diferenciáu del Duranguesáu. Les Encartaciones yeren de Castiella y nun van incorporase a esti señoríu hasta’l sieglu XIII calteniendo nél la so autonomía con una propia Casa de Xuntes n’Avellaneda. Nesta zona autrigona de Mena ye onde va surdir el castiellanu a partir del romance asturianu que va evolucionando hacia’l sur pero que nestos valles del norte va caltener elementos comunes propios del asturianu. Los rasgos idiomáticos del asturianu algamen hasta’l Nervión siendo Les Encartaciones, zona non bascuenciofalante, onde se caltienen. Nel bascuenciu-bizcaínu hai influyencia del asturianu  como finales en –u, o l’antropónimu Peru (Pedru) y otres palabres como “zaldi, maketo” provienen de les asturianes tieldón, magüetu. Rasgos característicos del asturianu tán presentes tamién en Les Encartaciones:

- Palatalización: llago, llaguna, llao, llama, llames, llamedu, llamegal, llosa, llameo, llamosa, llamaza, llamosías, llamina, llastra, llobera. La toponimia palatalizada ye perbayurosa: Llosa de la Llama, Los Llamíos, Llosa de Llamazales, Vaulallama, El Llamuco, Fuente la Llama, Las Llastras, Llosa del Cándano, Lluenga...

- Caltenimientu de F aspirada: f.aza, f.aya, f.ayal, f.errera, f.ornal, f.oyada, f.ornadilla, f.onadal...

- Sufixos –al, -ar: acebal, alisal, argomal, candanal, carrascal, castañal, cerezal, encinal, f.ayal, f.ornal, llamaral, manzanal, naranjal, parral, pedregal, peñal, escobal, espinal, rebollinal, cerolar, molinar, pomar, rebollar, viar...

- Grupu –mb-: palombar

- Sufixu –ada: Col significáu asturianu de conxuntu de o dimensional: parrada, barrancada, corralada, lomada, somada, rinconada... Tien gran vitalidá y espresa ciertu aumentativu.

- Sufixu –iego: Típicu del xentiliciu asturianu: madriliego, solariego, resiniego, ramiego, judiego, tarraliego. Según autores ye pre-romanu (llabiegu). Mui frecuente del Eo al Nervión. Al este del Nervión sólo ta documentada la voz alabesa lechiriega y el topónimu Arceniega.

- Sufixos –ín, -ino: Mui productivu na fala: barquín, puntina, paredina, bortallecín, chimilín, rebollino, asina como nos nomes de persona y tamién en topónimos.

- Sufixos – ucu, -uca: campuco, llosuca, peñuca, mazuca, barcenuca, castañaluco, fuentuca...

- Sufixos – iello, -uelo: Diminutivos asturianos que s’apliquen a aquelles palabres que fonéticamente lu permitan (cotiello). El primeru ye esclusivu y propiu del asturianu. L’usu de –uelo foi mui escasu en castiellanu primitivu y desapaeció pronto pero conservóse nel asturianu d’Encartaciones: arroyuelo, cabañuela, cabezuela, cerezuelo, conchuela, cornezuelo, cotoruelo, f.ayuela, f.azuela, f.oyuelo, plazuela, viñuela, tejuelo...

- Sufixu –ura: Ye mui productivu n’asturianu que suel formar abstractos verbales. Ye muncho más abundante n’asturianu qu’en castiellanu pa formar sustantivos que proceden d’axetivos y espresar l’efectu de l’acción verbal (friúra, malura, guapura, calentura...). En Las Encartaciones adopta valores concretos y yá lexicalizaos perdiendo cuasi calter de sufixu: estrechura, rotura, setura, horcadura, cezura...

- Sufixos –eda, -edo: Úsase pa nomar colectivos especialmente conxuntos d’árboles y la fala suel tender a la eliminación de la d intervocálica. Equival al bascuenciu “-adi”. Les palabres resultantes són les mesmes que nel asturianu común: argañeda, cereceda, manzaneda, moreda, noceda, pedreo, pereda, pedreda, f.aneda, f.aído, avellaneda, salcedal...

La política llingüística llevada alantre polos goviernos bascos nestes décades en Las Encartaciones foi una alloriante introducción espansiva del bascuenciu estándar nun territoriu históricamente asturiano-romance qu’esperimentó dende antiguo una fonda castiellanización como territoriu orixinariu del Reinu d’Asturies y llueu de Castiella. Tolos intentos por implantar el bascuenciu oficial nesti territoriu non bascófonu són un fracasu que sólo ve frutos nel intentu artificial de bascuencizar la toponimia como  indicar “Karrantza” o Valmaseda con “B”. Pero la tradición del romance asturianu ye la que domina tola toponimia de Les Encartaciones, igual que nes Asturies d’Uviéu,  Santiyana y  Tresmiera, caltenida a través de los sos nomes de llugar que nos suenen tan familares como Felguera, Molín, Palombar, Palombera, San Turce, Llobes, L’Oteru, El Llanu, El Bau, La Arbosa, Aguanaz, Ería, Escandal, F.oyu las Cabras, La F.untanía, Güeñes, Llosa de Llamazales, Sabugal, Nocedal, Llantada, Pando, El Sel, Sollano, Paraya, El Pontón, La Cuadra, Santa Cruz... Esta tradición nun ha desaniciase.

Autrigonia, la nación de los autrigones

Los autrigones son un pueblu celta pre-romanu enraigonáu nel norte de la Península Ibérica, ente la fonte del ríu Asón (Ruesga) y el ríu Nervión espardiéndose a norte y sur de la cordalera montañosa. Tán citaos pola mayoría d’historiadores antiguos como una nación propia, diferente y dixebrada tanto de los cántabros como de los bascones. Estrabón fala d’ellos na so Xeográfica llibru III, asina como Pomponiu Mela y Pliniu. Vivíen en castros fortificaos, en comunidaes bien establecíes nos valles dende antiguo, amás de cuntar con ciudaes portuaries y comerciales. Na ría del ríu Nerva (Nervión) teníen un puertu propiu yá que s’atoparon ellí monedes romanes. Trabayaben la industria de les salines. Axuntábense como los celtes delantre d’un árbol sagráu p’aconceyar. Los autrigones yeren un pueblu munchu más romanizáu que los asturcántabros hasta’l puntu de ser aliaos de Roma.

Ptoloméu llinda’l so territoriu col de los caristios, turmogos, berones y cántabros. Floro y Orosiu cuenten recibíen constantes ataques de tribus cántabres polo que pidieron l’amparu y la intervención de Roma p’acabar con esos violentos saqueos. Los autrigones nun yeren cántabros, yeren enemigos irreconciliables de los cántabros yá que precisamente foi l’ataque de cántabros contra los autrigones y l’alianza d’éstos con Roma lo que motivó l’entamu la guerra imperial contra los asturcántabros. Los autrigones fueron asina unos fieles aliaos de los romanos na so guerra contra los asturcántabros.

El motivu esgrimíu polos romanos pa la so intervención militar foi la pacificación d’esa zona debío a les frecuentes incursiones de los cántabros y de los ástures en territoriu d’autrigones y vacceos. Estes incursiones poníen en custión l’autoridá romana yá que’l non sometimientu de los asturcántabros yera un peligrosu exemplu d’espansionismu ya independentismu pal restu de pueblos recién dominaos. Incluso pudiera ser que los vacceos fueren cómplices de los deseyos espansionistes de los asturcántabros. Llueu de la victoria romana los autrigones obtuvieron como premiu el dominiu de nuevos territorios na cornisa atlántica algamando cuasi hasta’l ríu Deva. Los autrigones yeren una nación d’orixe céltica anque mui romanizada, a diferencia de los asturcántabros qu’inda nun recibieren l’influxu políticu nin cultural de Roma. Los nomes de les sos ciudaes en –briga indiquen una orixe inequívocamente céltica, asina como los topónimos célticos de los ríos Nerva o Cadagua y otros elementos culturales, arqueolóxicos y funerarios.

Hai quien defiende que na Alta Edá Mediana fueron invadíos o absorbíos polos bascones, que na so espansión hacia l’oeste desplazaron a so vez a caristios y bárdulos pal territoriu autrigón, lo que fizo que’l país autrigón se llamara col tiempu Bardulia, nome mencionáu yá nos documentos del rei d’Asturies Alfonsu III o que’l nome de los sos vecinos caristios desapaeciera lo que ye más probable. El territoriu autrigón pertenez tou él al Reinu d'Asturies yá dende Alfonsu I. Bardulia llegó a confundise con Castiella na Alta Edá Media. Unes de les ciudaes autrigones antigües yeren Flavióbriga, (Castru Urdiales), Sandoquitum (Santoña) que depués de la victoria romana pasó a nomase Portus Victoria, Tritium, Briviesca, Carranza, y Valmaseda. La nación autrigona modernamente vien conociéndose como’l Bastón de Laredo o País de les Cuatro Villes, y tamién són autrigones Les Encartaciones y la Montaña norte de Burgos. En 1396 les merindaes d’Asturies de Santiyana y Llébana formen un solu correximientu. La merindá d’Asturies de Tresmiera axúntase a la de Vecio formando’l nuevu correximientu de Les Cuatro Villes con capital en Laredu. Les Encartaciones pasen pa Bizcaya y el valle de Mena y tola Montaña van depender de Burgos.

La nación autrigona sodivídese en delles rexones naturales o valles: d’Asón, Vecio, Agüero, Trucíos, Cadagua, Carranza, Encartaciones, Mena y parte del valle del Ebru. Autrigonia llegó a conformase oficialmente como El País de les Cuatro Villes, provincia que perteneció per dalgún tiempu al Señoríu de Bizcaya. Esti territoriu formó una hermandá o provincia que llimitó al este con Bizcaya y al oeste con Asturies de Santiyana, celebrando xuntes xenerales propies dende 1555 a 1732, formando un territoriu históricu y consolidáu dende vieyo. Se-yos nomó tamién como Merindá de Castiella la Vieya algamando de nuevo tol territoriu autrigón. Les principales ciudaes autrigones són: Castro Urdiales, Laredu, Santoña, Briviesca, Poza de la Sal, Carranza, Ramales, Ruesga y Valmaseda. La capital de la nación autrigona ye Laredu, capital histórica d’esti país y principal puertu de Castiella. Autrigonia espárdese a un llau y a otru del cordal pel puertu de Los Tornos.

A partir del sieglu XV, debido a la relevancia del comerciu con Flandes, Inglaterra y Francia y hasta el XVII, Laredu alcanza importancia como sede del correxidor de les Cuatro Villes, llueu va facelo tamién el reximientu de milicies. Laredu destacó pol so poderíu marítimu y mercantil, siendo en 1529 l’únicu puertu de la costa, ente Bilbáu y Avilés, habilitáu pa les expediciones a América. Nel sieglu XIX Laredu esixó tener una provincia propia, fechu que-y foi negáu pola villa de Sanander que-y llegaría a quitar la preeminencia política en 1834.

Anguañu, el folclor autrigón ye mui ricu, destaquen les dances al són de los pitos, flautes o dulzaines autrigones con tamboril. Los homes visten traxes blancos de fiesta con boina adornaos con cintes de colores y les muyeres visten más cenciello pero dancen con arcos florales de munchos colores. Les anchoes y la pesca son el productu autrigón más típicu, ensin escaecer los salazones nun país que foi el principal camín del comerciu la llana. La llingua de la nación autrigona ye’l castiellanu anque con delles influencies del bascu pero sobre tou del asturianu, lo que conforma una especie de dialectu castiellanu peculiar. Autrigonia ye históricamente mui importante por ser el bierzu induldable de la nación castiellana.

La Provincia Eclesiástica d'Uviéu

El territoriu actual d’Asturies guarda muncha relación colo que ye la Provincia Eclesiástica d’Uviéu y la so diócesis.

Esta provincia algama dende’l ríu Eo hasta’l valle de Mena (Les Asturies) y pel sur comprende tamién los obispaos de Lleón y Astorga, formando toos estos territorios l’Archidiócesis d’Uviéu. La diócesis festeya Santa Olaya, Euloxu y Lucrecia, La Mercé, Les Reliquies, San Torcuatu y Cuadonga.

Ye Alfonsu II, rei d’Asturies, el que crea l’Obispáu y diócesis d’Uviéu nel añu 802 como capital y sede primada del reinu, nomando a Adulfo como primer obispu. Antecesora d’esta sede yera la diócesis de Llugo de los Astures. Yá so padre, Fruela I, edificara al llau del conventu San Vicente un palaciu real n’Ovetao, onde nació Alfonsu II y que realzará cola construcción d’una catedral a San Salvador y otra ilesia-panteón de Santa María. P’afitar esta principal sede obispal convoca’l Primer Conciliu d’Uviéu nel 802 proclamándose a Ovetao como sede metropolitana de toles diócesis del Reinu d’Asturies, ratificada pol papa Xuan VIII. A esti conciliu acudieron tolos obispos de les sedes del reinu, creaes o restauraes yá pola Monarquía asturiana: Tui, Viséu, Lamego, Astorga, Iria, Lleón, Palencia, Oca y Lugo que dende que se conquistara a los moros por Alfonsu I yera representante de Braga. Los obispos nomábalos el rei y yeren persones de l’alta nobleza asturiana mui cercanes al monarca pues facíen funciones polítiques.

Llendes obispales de Lucus Asturum

Alfonsu II confirma les llendes territoriales del obispáu d’Uviéu, la diócesis, desllendaes pel occidente nel cursu enteru del ríu Eo cola de Lugo y pel sur colos obispaos d’Astorga, Lleón, Palencia y Oca. Asina la mitra d’Uviéu algama tola fastera norte del reinu de peñes al mar dende l’Eo hasta Calagorra. Pero Alfonsu II necesita reforzar esta difícil parte oriental del reinu asturianu, el condáu d’Álaba, ente los ríos Nervión, Deba y Ebru, y siendo él fíu d’una alabesa crea nel 804 un segundu obispáu: Veleya, nel ríu Zadorra, una antigua ciudá romana abandonada y repuéblala afitando asina’l so control políticu sobre’l confin alabés. Hacia 881 n’época d’Alfonsu III los moros destruyen Oca y Veleya y esti obispáu treslládase cerca a un ablugu más seguru, a la ilesia de Santa María de Valpuesta que ya’l rei Aureliu dotara nel 773 con fueru propiu. Asina, l’obispáu de Veleya foi el segundu obispáu asturianu creáu por Alfonsu II nel so reinu que depués treslládase pa Valpuesta. Esta diócesis de Valpuesta va tener por llende occidental a la d’Uviéu nel ríu Miera. La diócesis d’Uviéu durante sieglos govierna los territorios ente los ríos Eo y Miera, esto ye, l’Asturies d’Uviéu y de Santiyana, Les Asturies de la Mitra d’Uviéu.

La ilesia d’Uviéu recibía xeneroses donaciones siendo refuxu d’aquellos obispos qu’afuxíen de les destrucciones mores nel Dueru. Nel sieglu XII l’obispu Pelayu lluchó contra’l nuevu obispáu de Burgos pa defender el territoriu d’Uviéu frente a les ambiciones burgaleses que queríen apropiase indebidamente d’Asturies de Santiyana como al final sucedió. Uviéu defendió la potestá de la so sede como primada frente a les reconquistaes de Toledo o Braga. Los papes reconocieron grandes ventayes a la diócesis d’Uviéu como la d’exención de Pascual II en 1105 pol qu’Uviéu foi diócesis exenta, dependiente directamente de Roma, estatus que remaneció hasta’l Concordatu de 1851 que rompió esta trayectoria d’independencia faciéndola sufragánea de la d’Iria-Compostela hasta 1954 que llueu de perder territorios históricos ovetenses nel altu Navia-Eo (l’arcedianatu asturianu de Burón) y otros en Lleón, Zamora, Santiyana y Astorga, torna ser sede metropolitana y Provincia Eclesiástica propia como siempre lo fuera.

La Mitra d’Uviéu entama n’Uviéu el primer Hospital Xeneral d’Asturies en 1093 nel antigu palaciu real d’Alfonsu III, l’Hospital de San Xuan. Nel sieglu XIV l’obispu recibe de Xuan I el condáu de Noreña. Les importantes reliquies, pelegrinos, monasterios, importantes tumbos como’l Llibru de los Testamentos Reales y grandes territorios propios como tamién yeren los de Benavente o Cartes contribuyeron a la bayura de la diócesis que nesti sieglu escomienza la construcción d’una nueva catedral gótica sobre la d’Alfonsu II que se remató en 1556. Hasta esti sieglu Uviéu tenía incluso una liturxa propia. Nel XVIII edifícase un nuevu panteón de los reis d’Asturies y créase un nuevu obispáu en Santander esgayáu de Burgos tornando esa diócesis, xunto coles d’Astorga y Lleón a formar toes elles el territoriu de la Provincia Eclesiástica d’Uviéu que tenemos anguañu como Archidiócesis Metropolitana d’Uviéu.