Frank Braña, una vida de cine.

Frank Braña, una vida de cine

El FESTIVAL DE CINE ASTURIANU dedica la octava edición al actor allandés recientemente fallecíu Frank Braña. Francisco Braña Pérez nació en 1934 en La Puela d’Allande, fíu d’un guardia civil, los constantes destinos del padre lleváronlu per residencies en Negueira, Fonsagrada, Ozcos, Doiras, Navia, L.luarca y Xixón. En Navia contactó col cine pues de nenu acudía al Cine Fantasio, que sigue conservándose milagrosamente, y pa entrar gratis trabayaba d’ayudante. Con trece años trabaya na construcción en Xixón, nel túnel de Noreña y en La Camocha. Cesa en 1954 pa ingresar na Guardia Civil pero por silicosis ñégase-y la entrada. Deprendió a manexar, inglés  y boxéu. Empezó  faciendo pequenos papeles d’extra como especialista nel cine pola fortaleza física. En Madrid consigue un papel na película de Gonzalo Delgrás Café de Chinitas (1960) gracies a l’amistá con Margarita Delgrás que lu recomienda pa los Estudios Bronston onde supera una prueba pa Rei de reis como doblador d’escenes peligroses. Nun sabía montar en caballu pero yá s’apañaría. Ganaba 550 pesetes diaries, munchísimo, y nin siquiera salía nos créitos. Adopta’l nome de Frank Braña. Sabiendo inglés, un gayasperu físicu y unos impresionantes güeyos claros abrieron-y les puertes a producciones estranxeres rodaes n’Hespaña, de vaqueros o históriques. Xunta  trabayos suyos onde sólo aparecía como especialista como El Colosu de Rodes, onde conoció a Sergio Leone, les primeres películes suyes acreditaes como actor fueron Los corsarios del Caribe(1961), Horizontes de Lluz (1962), Xuegu d’homes, Perséu l’invencible, Robaron una estrella,Los conquistadores del Pacíficu (1963), La carga de la policía montada, Los siete bravísimos,Brandy, L’home de la dilixencia, Los rurales de Texes, La tumba del pistoleru, Fuerte perdíu(1964), Joaquín Murrieta, Jandro, L’últimu mohicanu, La frontera de Dios, Tierra de fuéu, Adiós gringu, Una tumba pal sheriff (1965), Xugando a morrer, Mestizu, Dos contra Al Capone, El ranchu malditu (1966), Silenciu, El preciu d’un home, L’home que mató a Billy’l Neñu, Una bruxa ensin escoba, Un home vino pa matar, Dios perdona... ¡yo, non!, Cara a cara, Sugar Colt(1967), Quince hores pa un asesín, Dos homes van morrer, La hora del coraxe, Quiérolu muertu, Persecución hasta Valencia, El sabor del odiu,  Comandos, El secretu del capitán O’Hara (1968), La residencia, El zorru xusticieru, Santu frente a la muerte, La moza del Nilo,Ensin aliendu, El proscritu del ríu Coloráu, Garringu, Johnny Ratón, La muerte d’un presidente,Los diaños de la guerra (1969). Participó na triloxía de Sergio Leone: Por un puñáu de dólares,La muerte tenía un preciu  y El buenu, el feu y el malu.

A partir de 1970 el so nome aparecerá ya siempre destacáu. Nos años 1970 participó en 59 películes con Guiliano Carnimeo, Mario Bianchi o Leon Klimovsky y en westerns de José Antonio de la Loma, Rafael Romero Marchent o Juan Bosch qu’almiraron a Hollywood. Participa en Nicolás y Alexandra  (1971) en Delirios de gandura (1971) y nun capítulu de Curro Jiméneztituláu La trampa.

Llueu vendríen más películes como Duelo a muerte;Yo, el Vaquilla o Misteriu na islla de los monstruos ésta  con escenes rodaes en Outur. Rueda tamién comedies como Don Xuan el mio queríu pantasma y episodios de La casa de los enguedeyos o Los lladrones van pa la oficina. Los últimos trabayos fueron en L’hibiernu de les anxanes, Maestros, Tiovivu, Carla, y dos episodios de la serie Martes de Carnaval.

Frank Braña rodó unes 167 películes en cinco continentes. Non toes fueron actuaciones destacaes. Munches veces el so papel consistía en cayer del caballu o morrer al principiu  la película. Por ello ye l’actor que más veces morrió nes películes, unes 164 veces y unes quinientes actuaciones como especialista. En Golpe de mano (1970) representaba un dinamiteru asturianu que-y dio fama internacional. Otru éxitu foi  Perros cayexeros. Trabayó con Clint Eastwood, William Holden, John Carradine, Lex Barker... Rechazó un papel con Pedro Almodóvar. Siempre quiso  rodar un guión suyu sobre la postguerra nos montes de la so querida Asturies. Morrió en Collado Villalba en 2012 aquexáu de la so eterna mala salú de fierru. El 8u FESTIVAL DE CINE ASTURIANU  dedicará-y un sentíu homenaxe póstumu el próximu 17 d’abril nel Teatru Filarmónica, na Gala d’Entrega de Premios, que nun pudo celebrase en vida del actor debío al so repentín fallecimientu.