50 años ensin Marilyn Monroe

Mui estimada y admirada amiga:                                                         

                                                                                 2 d’Agostu de 1962

   Ruego me perdone la molestia y l’atrevimientu míu por dirixime a usté mediante esta carta. Supongo que tendrá munches coses que facer meyores y más importantes que lleer estes lletres míes y por ello intentaré roba-y lo menos posible del so valiosu tiempu. Yo nun toi mui segura si usté ye de les artistes que nunca llee les cartes de los sos admiradores o si ye de les que quizá dispón d’una oficina entera con xente dedicao al llabor d’abriles y si acasu  remitiles a usté.

    De toes maneres la mio intención nun ye pidi-y una foto dedicada nin nenguna otra cosa como suel ocurrir con munches cartes d’admiradores sinón que simplemente quiero comunica-y el gran apreciu y consideración que siento hacia la so persona y trayectoria nel cine, onde creo qu’usté ye una de les más grandes astirtes y amás de les más  elegantes y guapes.

   Tengo entendío que recién pasó algunos problemes de salú según cuntaron delles revistes d’equí, pero bueno, nun crea,  yo nun suelo facer munchu casu a lo que dicen les revistes sobre les artistes de cine pues yá sabrá usté por propia esperiencia que más de la mitá de lo que publiquen les revistes de cine nun son más que mentires inventaes pa esparder escándalos y asina, dar más resonancia a les películes y a los protagonistes. Usté, señora Monroe, sabrá perfeutamente y meyor que yo, cómo los estudios ellí n’América utilicen a les persones espublizando escándalos farfuyeros  y mentirosos sólo col propósitu d’ obtener rentabilidá o de promocionar un actor cuando non lo que se pretende ye acabar cola carrera y prestixu d’otros, y quizá cola vida y sustentu de los menos obedientes.

   Quiero que sepa, señora Monroe, qu’ a mí nun me parez bien que los estudios de Hollywood controlen asina la vida de les estrelles pues nun s’entiende cómo artistes de muncha fama y que nos gusten equí , de sópitu desapaecen de les pantalles por que sí y les revistes depués sólo dicen que talu o cualu actor quedó clisáu pola aparición d’otra nueva promesa más rellumante y qu’el públicu prefier. A mí, sabe usté,   gustáronme siempre un montón les revistes de cine. Recuerdo que de pequeña dicía  a mio madre que marchaba merendar a casa  los primos, que se llamen Pepe y Visita, anque toos la llamamos Visi, cada vez qu’ escapaba a la villa pa dar un paseín y poder comprar la revista de cine que salía los vienres, sabe usté, porque entós nun me podía permitir comprar más qu’una revista y ver dende fuera los cartelos de la película qu’echaben nel cine principal, pero sólo los cartelos, nun se crea usté, porque si compraba la revista nun me quedaba pa pagar la entrada del cine, amás les funciones acababen mui tarde, sabe , y tenía qu’entainar pa nun perder el coche de llinia pa tornar al pueblu porque sinón nun conocía yo a naide na villa que me pudiera llevar a la casa, amás tan tarde y naquella época d’escaseces, qué diba pensar la xente viéndome sola a eses hores de la nueche. Y ye que papá poníase mui furiosu conmigo cada vez que llegaba tarde a casa. Pero por suerte mamá  llevábanos a veces los domingos pela tarde al cine, a mí y a la mio hermana Sara la pequeña. Tenemos visto con mamá  toles películes del señor Clark Gable. A mamá, sabe usté, gustáben-y muncho les películes del señor Clark Gable, a ella y a les tíes, y a Dora y a Fina.

   Toes díbemos nel coche de Don Prudencio o nel de Don Anselmo si pintaba, vestíes como dames quiero dicir  comu de domingu de depués de misa y díbemos a la villa d’escursión y a mercar algo de ropa o lo que hubiere que comprar. A veces les tíes pa que nos comportáramos comprábennos a la mio hermana y a mí alguna revista de les artistes del cine que tanto nos gustaben , claro que lo primero que facíemos en llegando yera reservar les entraes del cine porque mamá quería los meyores asientos pa ver bien la proyección y ye que veníen pal cine de munchos pueblos, algunos mui distantes y nun se crea usté que’l cinema yera tan grande y por eso había qu’entainar poles entraes.

   

   Pues sepa usté que yo tenía una colección de fotos d’estrelles de la pantalla nun álbum mui gruesu con recortes de les revistes y postales, algunes firmaes como la d’Amparito Rivelles que me mandó a la escuela y otres incluso con dedicatoria personal como la de la señora Montiel que son dos estrelles d’equí que supongo conocerá yá que son cuasi de la mesma edá que la d’usté. Pero tener nun tengo  foto dedicada de nenguna artista americana y ello porque fui dexando un poco abandonada la mio colección col tiempu.

  

   Yá sé que los admiradores de les estrelles como usté s’esparden per tol planeta y supongo que ye imposible mandar fotos firmaes a tolos peticionarios que seguramente se cuntarán por millones. Por ello nun quixera molestala a usté o al so estudiu pidiéndo-y una foto firmada. Bastante molestia ye tener que recibir toles cartes que seguro recibirá al día, señora Monroe, incluyendo ésta, como pa tener que contestar d’una manera cortés  a toes elles. Nun quiero que piense que’l mio propósitu al escribila seya simplemente el d’obtener una semeya más pa una colección, non, yo sólo quiero que sepa qu’uste ye una fenomenal artista.

   

   A mí personalmente encantaríame poder llucir los sos vestíos y el so pelo tan rubio y tamién poder conocela y saludala na so guapísima casa de California y cómo non, sinceramente tamién prestaríame pola vida poder actuar colos guapísimos galanes colos qu’usté trabaya nes películes, señora Monroe. Pero penriba de too debo confesar qu’usté me parez la meyor actriz actual de comedia de Hollywood, insuperable y sepa que de verdá  eclipsa a cualquier otra actriz cola qu’apareza en pantalla . Siempre ta sensacional en toles películes, señora Monroe.

   Viemos hai unos años nel cinema “Cómo casar con un millonariu” y la mayoría piensa igual que yo que l’actuación suya ye mui superior y más completa que la de la señora Bacall o la de la señora Betty Grable. Tamién creo que frente a la señora Russell usté destaca muncho más como actriz. Prestonos un montón la comedia del señor Wilder “La tentación vive arriba”, onde sin el so trabayu espléndidu la película creo que nun tendría munchu aquél y amás colos señores Tony Curtis y Jack Lemon vímosla magnífica. Felicidaes señora Monroe. Deseo que la carrera suya dure munchísimos años y que yo y toos la veamos avieyar, con perdón,  na pantalla y non sólo en comedia sinón tamién en tou tipu de drama. Tamién préstame muncho cómo canta , señora Monroe, tan suxerente y sensual.

  

  

   Pero nun crea que nun quiera yo una foto suya, sabe usté, pero tengo un poco de temor a que depués la xente entame a facer de les suyes y me pongan nomatos o algo peor, sabe usté, porque equí la xente nel pueblu gústa-y demasiao falar de los demás y saca-y nomes ridículos al vecindariu y tamién della xente ye mui bruto y llueu pasa lo que-y pasó a Dora, sabe usté, sí, a la probe Dorina cola que díbemos al cine de pequeñes a vela a usté na pantalla y digo probe porque la  afición d’ella al cine terminó por perxudicala gravemente y too por culpa de la xente, sí, d’esa xente qu’hai en tolos llaos, seguro que tamién nel so país y que sólo se divierte fadiando  a los demás y usté, señora Monroe, de xuru conocerá a más d’unu d’esta frasca. Y ye que Dora yera mui fanática del señor Clark Gable,  sabe usté, que por cierto tenemos munches ganes de poder ver “Vides rebeldes” y ye que tovía nun nos llegó per equí, yá sabe que nesti país hai que doblar los diálogos pa que veamos les películes estranxeres y ello lleva munchu trámite, pues bien, dicía-y qu’a Dorotea, que’n realidá asina se llamaba ella porque asina la nomaba siempre la madre, siempre-y gustó muncho el señor Clark Gable, quiero dicir les actuaciones del señor Clark Gable y recuerdo mui bien tola xirigoncia desaxerada qu’entamaron contra la probe Dora cuando ella recibió una carta de Hollywood con una auténtica foto firmada del señor Gable pa ella. Mire usté cómo sedrá equí la xente de bruto qu’empezaron toos a reíse de la probe Dorina.  Decíen-y a ella que’l de la foto nun yera de verdá Clark Gable, que yera otru que se-y asemeyaba muncho y preguntáben-y con malicia que pa cuando diba ser la petición de mano, que si yá encargara’l vestíu pa la boda col señor Gable, que si n’América se llamaría Dorothy, que si señora Gable..., total, qu’amoriaben la cabeza a la probe Dorina y enseguida tuvo en boca y oreya de tola comarca y como había varies Dores nel pueblu pues a la nuestra empezaron a nomala Dora “la Garbo” y ello non porque fuere nin que digamos tan guapísima como la señora Garbo, sabe usté, porque la probe Dorina yera poco agraciada hasta pa nun parecese en nada a la cara o al cuerpu de la señora Greta Garbo. Pero como equí la xente nun sólo ye bruto sinón que tamién ye lo bastante inculto como pa nun saber pronunciar a xeitu n’inglés lo de “Géibol” pues quedó-y “Garbo”, anque más por chancia puesto qu’ente les munches cualidaes de la nuestra Dora nunca la verdá destacó la de ser garbosa, porque yá-y lo dicía yo a Dora que por qué nun te pones ésto pa dir baxar a la villa que te va más con esto otro; que por qué nun te cortes el pelo como la señora Monroe,  tan moderna siempre. Pero non, la probe Dorina nun dexaba les trences nin pa dormir n’hibiernu y eso que yá yéremos daquella mayorines bastante como pa poder llevar el pelo a lo corto como les actrices y yá nun pasaba nada por gastar algún pantalón más ceñíu qu’otru, pero la probe Dora yera conservadora hasta pa eso. Pero yo quería muncho a Dorina, sabe usté, por eso  molestome lo suyo cuando pasó too aquello de la carta. Nun sabe cuánto m’enfadaba yo cada vez qu’oyía eso de la Dorotea Garbo o Dora la Garbo. Amás, a la nuestra Dora yá toos la conocíen como Dora la de Delfina polo que’l nomatu aquel nun venía a cuentu pa nada. Pues yá se figurará usté qué me podría pasar nesti pueblu de recibir yo una foto d’una gran estrella d’América.

   Y ye que la verdá , lo que pasa  ye qu’hai muncha  envidia  na xente que nun-y  podía  permitir  a  Dorina  que recibiera ella sola una carta de Hollywood del mismísimu Clark Gable, y encima dedicada y firmada  ; que si había otres más guapes nel pueblu qu’ella pa casase con un galán del cine y otres patochaes que dicíen pa burllase de Dorina. Pues a mí nun me gustaba tanto’l señor Clark Gable como a les demás, de físicu digo, pues ye mui parecíu al tipu d’homes que se ven equí, tan morenu; tengo que confesa-y qu’a mí personalmente m’atraen más otros galanes del tipu del señor Tyron Power o el señor Ladd que se ven como más estilaos, como me gusten a mí los actores. En fin, que Dora foi enseguida tan famosa en tola comarca como la   mesmísima Greta Garbo. Y desgraciadamente pa ella porque la mayoría la xente nun sabía cuntar bien la película y camentaba que lo de Dora Garbo yera por guapa más que nada y pa lo que-y valió a la probe a fin de cuentes foi pa nun olvidalo en tola vida pues una tarde que tornaba solina  pal pueblu mui sero y depués de baxar de la llinia cerca la carretera pilláronla unos mozones nun descampáu y ellí mesmu ficiéron-y nunches inmoralidaes de les qu’usté yá se figura y que prefiero nun detallar, y parez ser que la probe Dorina  llegó a casa fecha un felpeyu y toa estrenzada y espelurciada  y menudu sustu pasaron los padres y ellí quedó la cosa en boca zarrada pero de ser yo nun se crea usté que los primeros en sabelo sedríen los del cuartel.

  

   Yá en cumpliendo los dieciocho papá regalonos a mí y a la mio hermana Sara  una bicicleta pa les dos y al añu compró-y otra pa ella sola y yá podíemos dir al cine a la villa los domingos o cualquier otru día que nos peteciere con cierta llibertá y nun depender tanto del coche de llinia pa volver y tamién con menos mieu too hai que dicilo.

   Sepa usté, señora Monroe, qu’equí nun esfrutamos del clima tan soleyeru como’l de California y cuando llueve, cosa bien frecuente, los caminos tarden lo suyo en secar pues desgraciadamente nun tenemos eses carreteres grandes y alquitranaes comu n’América, y nun crea que’l pedaléu supunxo pa nosotres munchu avance respectu al escacharráu autobús. Nun se puede usté figurar cómo ye la nuestra carretera del pueblu, señora Monroe, pues alcuéntrase tovía tan estrada de piedrones y furacos que lo que gastamos n’iguar  les bicis y los vestíos y medies rotes nun ye broma amás de la llimpieza de too ello pues si la carretera tien humedá, cosa frecuente nel nuestru pueblu la mayor parte l’añu, maxínese usté cómu llegamos a casa, sudaes y encima con tolo que la carretera nos quiera echar de barru na ropa del domingu.

   Gústanos munchísimo los vestíos que lluz, señora Monroe, y nun nos perdemos nenguna de les sos películes.

    Nun se preocupe polo de la foto dedicada si ye muncha molestia y sedría pa mí un auténticu honor qu’usté o’l so estudiu tuviera a bien en contestar a esta carta mía d’admiración hacia la so trayectoria profesional y humana.

   

Sedría un suañu pa mí poder conocela allá en California o quizá algún día poder saludala personalmente y deseo sinceramente qu’al recibir esta carta s’alcuentre usté recuperada del so pequeñu resfriáu.

  

   Un saludu mui cordial de la so  lleal admiradora.

                                                                                                             

                                                                                                    

                                                                    Clara  Mª Méndez-Santillán