XAVIELVILAREYO

La Ilustración Asturiana

Asturies tien una historia tan llarga y bayurosa que merecería cuntar con un Muséu d’Historia d’Asturies. L’Arqueolóxicu d’Uviéu bien podría tener vocación de muséu históricu asturianu. La política de museos-conceptu (madreña, gaita, quesu, calamar...) nun desplica l’error de nun tener n’Asturies un Muséu de la Ilustración Asturiana que taría bien afayáu na casona Xovellanos en Xixón. Si hubo una tierra que rellumó nel sieglu XVIII pola so aportación a les idees reformistes de la Ilustración ésa foi Les Asturies y los ilustraos asturianos. El comerciu con Inglaterra y Francia pela mar permitio-y a Les Asturies tar na vanguardia del pensamientu modernu.

Feijóo escribe n’Uviéu tola so obra filosófica de gran repercusión asina como los científicos esperimentalistes Gaspar Casal, Pedro de Peón o Esteban López. Álvaro Navia-Osorio en publicando los 10 tomos de la so enciclopedia militar asume llueu la redacción d’un Diccionariu Universal, al xeitu de los enciclopedistes. Proyectos ilustraos asturianos són la nueva cárcele de muyeres y l’Hospiciu Xeneral d’Asturies pa probes y güérfanos de 1752 obra del arquitectu candasín Pedro Antonio Menéndez, que foi modelu de política social nel so tiempu. Pedro Rodríguez de Campomanes consigue gran prestixu intelectual cola so moderna política económica basada nel lliberalismu británicu. En 1770 créase la Biblioteca de la Universidá d’Uviéu y en 1774 ésta moderniza los sos planes d’estudios xurídicos. De 1775 ye’l Colexu d’Avogaos d’Uviéu. En 1778 Asturies d’Uviéu entama la reforma del so Estatutu políticu presentáu por Canga Argüelles a la Xunta Xeneral en 1781 como Ordenances pal Goviernu del Principáu, afirmándose la potestá d’esa institución pública como cámara llexislativa y executiva. Pel so llau la otra provincia asturiana, la Mui Noble y Leal Provincia d’Asturias de Santiyana, quier tamién reforzar les sos curties competencies amestándose en 1778 cola provincia de Llébana, intentando dignificar la so Xunta provincial de Bárcena de la Puente. De 1780 ye la Sociedá Económica d’Amigos del País d’Asturies y de 1798 la Sociedá Económica Cantábrica.

En 1782 Xovellanos torna p’Asturies pa facer la estrada Xixón-Uviéu, entamu de toa una corriente industrializadora que vendrá bien llueu (mines de carbón, siderurxa, fábriques de céramica, d’armes) na que va destacar l’empresariu Raimundo Ibáñez, nomáu depués primer Marqués de Sargadelos. Xunto con González Posada, Xovellanos tenía la idea de crear dende 1770 una Academia Asturiana de Bones Lletres col fin de formar un diccionariu del idioma de los asturianos que sistematizara toles palabres. Ye nuna carta de Xovellanos onde apaez per primer vez escritu el términu “bable”, que significa “fala”, tomáu del cultismu francés “fable” o fábula. Xovellanos escribe que pa facer el diccionariu del nuestru idioma llamáu comunmente “fabla” ye necesariu amestar una cita de la fala viva o de poesíes yá escrites. En 1801 esta Academia Asturiana entama les actividaes con conferencies selmanales. Francisco Xavier Martínez Marina proyecta un Diccionariu xeográfico-históricu. En 1794 inaugúrase l’Institutu Asturianu de Náutica y Mineraloxía en Xixón, col fin d’ufiertar estudios superiores científicos.

Nel periodismu ilustráu destacó Manuel Rubín de Celis, fundador de revistes y periódicos como “El Corresponsal del Censor” onde escribiríen otros ilustraos como Díaz de Valdés, Arango Sierra, Antonio del Riego, Benito Pérez, Álvarez Caballero, Manuel Santurio o Ceán Bermúdez. Juan Pérez Villamil escribió contra los gremios, idea anticorporativa mui ilustrada yá que perxudicaben la llibertá d’empresa.

Nel campu les artes l’aportación de los asturianos a la Ilustración o Neoclasicismu ye almirable. Arquitectos como Pedro Antonio Menéndez, Manuel Reguera que diseñó l’Arcu del Infante Pelayu o Puerta la Villa de Xixón en 1783 ente otres obres públiques d’inxeñería, Francisco Pruneda autor de la desaparecida plaza porticada del Fontán d’Uviéu, Benito Álvarez que renueva’l claustru del conventu Santa Clara, Juan Pruneda autor de retablos neoclásicos y del Monumentu a Xovellanos o Juan Antonio Cuervo. Pintores como Francisco Reiter y Francisco Xavier Hevia. Escultores como Julián de San Martín, Francisco Xavier Meana y Miguel Antonio López. Escritores como Antón Valvidares, Xosefa Xovellanos, Bruno Fernández Cepeda, Benito Auxa, Francisco Xavier de Bustamante, Fernando Caxigal, Jorge Fernánez Bustamante, Miguel Antonio Gándara o Francisco de Rávago. Y compositores de música de gran talla como Ramón de Garay, pioneru del sinfonismu européu, autor de diez sinfoníes de cuatro movimientos, una ópera y un amplísimu repertoriu de música relixosa. Toos ellos son l’exemplu d’una tierra que con enfotu colectivu puede tornar a ser próspera y avanzada.