El 5 de febreru del 2009 presentábase na Biblioteca del Campu San Francisco d’Uviéu el llibru de Xaviel Vilareyo tituláu “Los ámbitos de la Nación Asturiana”. El llibru supunxo toa una revolución nel ámbitu del nacionalismu asturianu y foi tou un éxitu social y de repercusión de ventes, a pesar de que’l llibru recibió tou tipu de rechazos por parte de los ámbitos oficiales. El llibru publicólu la editorial Espublizastur ensin nengún tipu d’ayuda económica pública pero resultó ser tou un éxitu. Nel llibru Xaviel Vilareyo espón de xeitu didácticu la evolución histórica y la configuración del territoriu asturianu que constituye anguañu l’ambitu territorial de lo que reconoz como la Nación Asturiana. El llibru reivindica l’ámbitu tradicional y étnicu de la Nación Asturiana, configuráu pel territoriu de Les Asturies al norte del cordal y los Países Asturianos al sur. Asturies de Santiyana, Llébana, Sayambre, Valdeón, Altu Navia y la Ribeira del Eo són Asturies ya que’l so territoriu ye asturianu histórica, física y culturalmente. El llibru escribióse nel añu 1998 pero nun se pudo publicar enteru hasta diez años depués yá que sufrió tou tipu de prohibiciones, vetos y censures incluso por parte de dellos ámbitos supuestamente “asturianistes”. Sólo se publicó dalgún estractu del mesmu nes páxines de la revista nacionalista “El canciu’l Cuélebre”. El llibru de Xaviel Vilareyo tuvo tanta repercusión qu’inclusu el so autor recibió por ello una campaña d’acosu entamada a instancies oficiales del poder políticu, campaña de la que l’autor se siente mui arguyosu y contentu, yá que consiguió desenmazcarar falsedaes y poner munches coses nel so sitiu correctu.
Con motivu d’estos dos años de publicación de “Los ámbitos de la Nación Asturiana” reproducimos la entrevista que Xaviel Vilareyo concedió entós a infoasturies.
Falemos col escritor asturianu Xaviel Vilareyo y Villamil (Mieres del Camín, 1967) sobre’l so llibru “Los ámbitos de la Nación Asturiana”, que vien d’asoleyalu cola editorial Espublizastur dientro de la so coleición “Ensayu”.
Anque Xaviel Vilareyo tien asoleyaos abondos artículos, collaboraciones periodístiques y ensayos en delles revistes, con “Los ámbitos de La Nación Asturiana” espubliza’l so primer llibru d’ensayu.
Xaviel Vilareyo, llicenciáu en Derechu, profesor y escritor, foi gallardonáu con dellos premios lliterarios como’l Valentín Andrés, Elvira Castañón, Vila de Sarria, Xeira y Premiu de Teatru de l’Academia, tien publicaes delles obres: Cróniques del recuerdu (Ed. del Norte,1997), Más que probable (Ed. Vitrubio,1998), Os novos poemas (Xeira,1999), El camín d’inquietú (Ed. del Norte, 2001), La causa más probable, (Trabe, 2007) Historia del cine asturianu (2009). Amás tamién publicó en delles revistes como “Lliteratura” y “Lletres Asturianes”, ente otres munches.
•Si nun mos equivocamos, pesie a tener espublizaos dellos llibros, entovía nun publicares dengún ensayu llargu. Cuéntanos un poco cómo foi el procesu d’ellaboración d’esti ensayu.
L’ensayu surdió yá que personalmente siempre me llamó l’atención el xeitu nel que s’usen los axetivos asturianu y asturiana. Les élites politiques eviten esti axetivu yá que pa ellos ye una especie de tabú y prefieren usar otros axetivos como “rexonal”, “llariegu” o “autóctonu”. Ye increíble que presumiendo de saber tanto, haya tantu investigador, científicu y espertu que pretenda pasar por historia, cultura, llingua, gastronomía… asturianes, dalgo que si lo mires bien en realidá nun ye más qu’estudios referíos sólo al ámbitu territorial de la provincia d’Uviéu. Yo a eso llámolo provincialismu que ye dalgo peor que’l provincianismu. El provincianismu polo menos ye socioloxía pero’l provincialismu ye daqué nefasto porque ye ignorante y nun sabe qué ye lo qu’esiste.
N’Asturies faltónos una figura como la de Caro Baroja en Basconia qu’analizara tol procesu históricu del pueblu y la cultura asturianes na so globalidá. Siempre hubo visiones parciales y restrinxíes d’Asturies y de lo asturiano, de temes concretos, pero faltónos una visión xeneral de too ello. Y esa visión xeneral nun ye otra cosa que la Nación Asturiana.
•El llibru ta espublizáu ensin denguna subvención ¿Ye difícil publicar un llibru como esti y d’esta temática n’Asturies? ¿Cómo ves el panorama editorial n’asturianu?
Bueno, ye como entruga-y al enforcáu qué opina de la soga. Pues opino qu’hai afortunadamente abonda xente qu’escribe bien n’asturianu pero pal poder dominante somos yá munchos y la llingua nun ye nin oficial, el goviernu piensa que somos yá demasiaos los qu’escribimos n’asturianu y yá nun sabe qué facer con toos nós. Primero quier desmoralizanos colo de dar más dineru en premios pal castiellanu que pal asturianu. Segundo quier que dexemos d’escribir n’asturianu a base d’enfrentar a un grupu d’escoyíos o afines al poder col restu. Tercero, quier controlar lo que s’edite a base d’unos criterios políticos ya ideolóxicos nel repartu de los presupuestos y suvenciones. Cuarto, quier evitar protestes del colectivu a base d’engaños. Trevín dixo a un grupu d’escritores orgánicos que de nun haber oficialidá habría dineru asgaya pa toos, intentando compra-yos la so voluntá y esa ye otra mentira más del PSOE, el dineru qu’hai pal asturianu ye y sedrá más bien escoso porque quieren seguir dixebrando too. En resume, cualaquier babayada posmoderna que nun comprometa va publicase si yes afín o amigu del partíu governante, si non, tien que ser mui bueno o interesante pa que dalguién te lo publique. Otra solución ye que cada escritor entame la so propia editorial particular que ye más o menos lo que ta pasando agora porque les editoriales convirtiéronse en simples intermediaries y clientes del poder. Menos mal que surdió Espublizastur.
•¿Qué acoyida ta teniendo’l llibru? ¿qué te comenta la xente que yá lu lleó?
Mui bona acoyida. Sorpréndense de que nun seya un llibru con intención ideolóxica, nel sentíu de partidista. La cultura nun ye de dereches nin d’izquierdes y la etnoloxía tampoco tien ideoloxía nin sigles. La cultura asturiana ye de tolos asturianos de toles tendencies y lo mesmo podemos dicir del territoriu, de la música o la gastronomía, de les formes culturales en xeneral. Conservar les tradiciones nun significa ser conservador na moral o na política. Como querer el progresu económicu de los pueblos tampoco significa ser un progresista. Toos queremos lo bueno y rechazamos lo malo. La esistencia de les naciones y los pueblos ye dalgo bueno y positivo porque ye consustancial a la esencia del ser humanu, somos seres sociales y colectivos con formes culturales comunes y especifiques. Y eso ye lo guapo del ser humanu, que formamos pueblos y colectividaes, países y naciones, llámémoslo como lo llamemos. Falar de nacionalidaes o de comunidaes autónomes o de rexones paezme daqué horrible porque ta mui politizao. El conceptu etnolóxicu de nación ye nesti sentíu el más neutru y el que más respetu tien por parte de les ciencies sociales. Formar parte d’una nación cultural nun significa tener que votar a una organización política nacionalista, falamos de conceptos culturales y non de grupos políticos. Yo creo que la xente que lleó’l llibru entendió mui bien lo que quiero desplicar nél.
•¿Por qué ves necesariu l’alderique alredor de los ámbitos de la nación asturiana?.
N’Asturies tenemos que reivindicar la historia asturiana inda más que la llingua asturiana. Asturies esistió como realidá física muncho antes de que surdiera la llingua asturiana romance. Nel casu asturianu nun ye la llingua la que conforma la nación sinón la historia. L’idioma asturianu ye un elementu importante pero non l’únicu configurador. La llingua, como’l folcore o la cultura cambien y evolucionen pero la idea de nación asturiana remanez nel tiempu como la casa común de toos. La nación asturiana nun ye nengún inventu artificial. Oxetivamente la nación asturiana esiste y ta ehí esistiendo con una tradición más que bimilenaria. Otra custión ye si esa realidá material nos presta o non, si nos sentimos arguyosos d’esa especificidá o si nos avergoñamos d’ello, pero ésto ye más propio de la socioloxía y nun ye tema del mio llibru yá que de lo que falo son de realidaes históriques. Too cambia menos la idea de nación. Ye la nación la qu’adopta nueves realidaes culturales como propies o nacionales. Igual que s’inventen neoloxismos tamién surden fechos culturales que la nación en conxuntu adopta como propios. Ensin una idea clara de nación asturiana la cultura propia ye imposible de caltener y conservar, y muncho menos la llingua. El territoriu ye un elementu básicu pa la identidá nacional.
•El llibru afítase sobre’l conceutu d’ethnos y los ámbitos del ethnos o nación asturiana nel tiempu. ¿pues desplicamos per enriba que ye l’ethnos asturianu y dende que planos lu analices?
Intento analizar l’ethnos asturianu nel sentíu propiu de pueblu o grupu nacional, el conxuntu d’individuos de la mesma cultura y l’ámbitu territorial d’esta nación. La etnoloxía asturiana sedría asina la ciencia qu’estudia según criterios sintéticos tola cultura nacional asturiana no que ye propio y definitorio d’ella mesma. Falo d’etnoloxía y non d’etnografía yá que n’Asturies más que d’etnografía tenemos que falar d’etnoloxía puesto que los asturianos somos una nación o pueblu y non una raza o una tribu esperdigada. Lo museos n’Asturies tienen que nomase etnolóxicos y non etnográficos. La etnoloxía non sólo describe sinón qu’interpreta. La etnografía equival a la dialectoloxía, al datu concretu específicu, analíticu, mentantu que la etnoloxía equival a la llingüística, a la visión xeneral y sintética. N’Asturies fáltanos eso, sobra análisis y falta síntesis. Sobren etnógrafos y falten etnólogos. Naide se preocupó en facer un mapa de los teitos de paya, de los horros, de la gaita, de la llingua, de la mitoloxía, de los bolos… de tantes coses. Eso sí, monografíes d’un conceyu, d’un valleyu, o d’un llugareyu hailes hasta l’aburrición.
Tamién falo de la etnoxénesis asturiana, de cómo se formó la nación asturiana a lo llargo la historia y cómo ye ésta la que la conforma y cómo se va afitando l’ambitu territorial d’esta nación.
•Esti ye’l primer llibru qu’entra dafechu na problemática territorial d’Asturies, de les llendes de la nación asturiana. ¿Cómo te tomes les posibles crítiques que puen venir, tanto dende’l “Principado” como dende fuera, al nun coincidir les llendes que propones coles alministratives?
Pero les crítiques nun pueden dir contra min sinón contra la propia historia o contra la propia etnoloxía que describo. Tamos falando d’opiniones y yo nel mio llibru nun doi la mio opinión de lo que describo sinón que lo qu’ufierto son datos, quiciabes demasiaos datos pa un solu llibru. Por exemplu, lo que nun mento nel llibru ye la posibilidá que se baraxó na preautonomía de facer coles provincies d’Uviéu y Santander una sola Comunidá Autónoma conservando les dos diputaciones. Tampoco falo de la idea de xuntar Asturies con Lleón, o de qu’Asturies participe na nueva lliga de fútbol de les naciones celtes. Yo nun falo nel llibru d’esto, d’opiniones. Podemos criticar les idees de caún pero criticar los datos históricos y los elementos etnolóxicos ye ridículo. Agora bien, si un horru o una gaita dicimos que son asturianos tenemos que saber mui bien a qué nos tamos refiriendo, son asturianos porque tán en y son d’Asturies, por eso tenemos que tener una idea mínimamente clara de lo que ye físicamente Asturies.
El Pincipáu d’Asturies en realidá diba del ríu Eo al ríu Miera nos sos oríxenes baxomedievales, ye de les dos Asturies. Ye difícil d’entender pero la dixebra alministrativa de les dos Asturies nun dixebró la nación o ethnos. Ye más, hai años dieron la noticia de que’l gobiernu de Cantabria solicitaba que’l príncipe hespañol fuera tamién príncipe de Cantabria, nel so afán por cantabrizalo too, y tienen la so razón porque los príncipes lo yeren de Les Asturies, d’Uviéu y de Santiyana. Negalo sedría reconocer l’absurdu de que Peñamellera y Ribadedeva nun pertenecen al Principáu porque son Asturies de Santiyana. El Principáu yera too y ehí tán los mapes históricos.
•En “Los ámbitos de la Nación Asturiana” entres tamién nos Derechos Históricos d’Asturies. ¿ Ye un tema escaecíu dientro de les vindicaciones nacionales asturianes?.
Los Derechos Históricos Asturianos nun són nenguna novedá, ehí tán les Ordenances históriques por exemplu, el derechu civil asturianu. Hai abonda doctrina constitucional yá que la Constitución hespañola reconozlos y ampáralos, nun ye nenguna ideoloxía nacionalista, son derechu reconocíu y llegal. La novedá que planteo ye la idea de la territorialidá asturiana como derechu históricu, pero esa idea hai que rebatila con argumentos históricos y xurídicos non con descalificaciones de nengún tipu. La territorialidá asturiana ye mui clara na historia pero sufrió unos recortes impuestos. Cataluña tamién perdió territoriu, el Rosellón, pero sólo físicamente porque anímicamente siempre lo tienen presente. A min gustaríame que tolos asturianos, nacionalistes o non nacionalistes, de dereches o d’izquierdes, toos tengan siempre presente’l territoriu históricu d’Asturies nel so corazón.
• La conclusión del trabayu son los ámbitos actuales del ethnos asturianu ¿Cuáles son los ámbitos de la Nación Asturiana?
Si los ámbitos históricos de la nación asturiana son claros los actuales nun lo son tanto, polo menos pa muncha xente. Ye ehí onde l’ensayu aporta la idea de que l’ámbitu actual del ethnos asturianu algama dende’l ríu Eo al valle del ríu Nansa. Ye’l cursu enteru del ríu Eo y non sólo la so ría la que fai la llende política yá dende’l sieglu XI, pero curiosamente tamién ye ésta una llende cultural y los asturianos tenemos que tenelo mui presente. Otra llende márcala la vertiente o divisoria d’agües al norte y al sur del cordal asturianu. La fonte del Ebro siempre foi onde terminó Asturies, pero según el conceptu oxetivu de nación nos otros valles más orientales d’Asturies de Santiyana l’asturianidá foi perdiéndose pol influxu castiellanu, pero nun dexa de ser otra idea porque s’investigáremos a fondu en sentíu sintéticu y non analíticu a lo meyor atopamos munchos más elementos culturales y llingüísticos de los que pensamos nun principiu y que son comunes y compartíos col restu d’asturianos.
•Tampoco vamos a desvelar tol llibru asina que lo meyor ye que la xente lu merque. ¿Por qué deberíemos mercar “Los ámbitos de la Nación Asturiana”?
Porque a los asturianos se nos intentó tapecer y manipular la nuesa historia pa que nun la reivindiquemos, pa que nun reivindiquemos nada. Porque hai qu’entender que non sólo se minorizó a la llingua o a la cultura asturianes sinón mui fundamentalmente minorizóse’l propiu territoriu d’Asturies. Porque la historia nos da les claves pa interpretar qué ye lo que-y pasa güei a Asturies, un país desilusionáu con una clase dirixente desilusionada, que nun siente’l país nin la so cultura. Por ello, tenemos que confíar menos nos políticos y más en nosotros mesmos, nel poder rexenerador y cultural que puede facer el pueblu asturianu en conxuntu. Y esta idea pa min ye una idea ilusionante. Non sólo hai que facer país, frase tan repetida como vacía, hai que pensar país y sobre too sentir país. Si nun pensamos nin sentimos el país, la nación o la tierra asturiana, nun podremos facer nada sobre ella.
•Pues despedímonos animando a la xente a mercar el llibru. ¿Quies dicir daqué pa finar?
Que anque a veces digamos lo contrario, nel fondu toos sentimos muncha allegría de ser asturianos de verdá, de pertenecer a esta patria asturiana nuesa, con una historia tan dura de resistencia, emigración y probitú y lo pequeno que somos, creo que fai que sintamos toos como ciudadanos d’Asturies dalgo mui especial y afalagador.
