Asturies en 1815

Asturies en 1815 

Escrito por Xaviel Vilareyo 

Asturies yera en 1815 un país de población básicamente campesino onde la principal ciudá yera Uviéu con unos 10.000 habitantes siendo José Cauz l'alcalde. Xixón y Sanander cuntaben con unos 6.000 ciudadanos. El total d'asturianos algamaba al mediu millón, cifra importante entós. La emigración asturiana diba mayormente hacia Madrid y ocasionalmente a Castiella pa la temporada del cereal. Asturies soporta la tiranía del rei Fernando de Borbón qu'escomienza una política de represión nel territoriu asturianu, persiguiendo y encarcelando a lliberales y militares progresistes ya incluso a sospechosos de ser lliberales, esto ye, partidarios d'un sistema parlamentariu y representativu. Munchos asturianos deciden por ello marchar pal exiliu. Álvaro Florez Estrada, que fuera Procurador Xeneral vive nel exiliu de Londres igual que José María Queipo de Llano, conde de Torenu, qu'afuxe d'una pena de muerte. Agustín de Argüelles sufre prisión en Ceuta poles sos idees lliberales. Francisco Xavier Martínez Marina tenía recién publicada la so obra "Teoría de les Cortes" y corría seriu peligru de detención, igual que'l políticu republicanu Felipe Vázquez Canga. Desapaecen periódicos lliberales como El Observador y prohíbense abondos llibros. L'ochu de marzu d'esti añu naz n'Uviéu l'escritor Xuan María Acebal.

A principios de 1815 el Congresu de Viena llevaba yá meses reorganizando los estaos d'Europa ente llacuades y fiestes pero Napoleón escapa del exiliu n'Elba y torna al poder en París cola ayuda l'exércitu. El 18 de xunu Napoleón sufre la so definitiva derrota en Waterloo ante les tropes del Duque de Wellington y prindáu envíenlu pa Santa Helena. En setiembre fírmase la Santa Alianza ente Rusia, Austria y Prusia, afitándose l'absolutismu, y Francia vese obligada a devolver territorios, obres d'arte robaes y al pagu d'indemnizaciones de guerra.

En 1815 publícase’l primer mapa xeolóxicu del Reinu Xuníu y de 1815 ye tamién esti mapa auténticu d’Asturies qu’ilustra estes llinies.

El 3 d'ochobre enforquen en Coruña a Juan Díaz Porlier que lluchara n'Asturies contra los franceses llueu d'intentar un primer pronunciamientu militar lliberal que nun prosperó. La torna al absolutismu xenera guerres coloniales en Venezuela y L'Arxentina. Rafael del Riego xúnese a la masonería intentando acabar tamién col absolutismu.

Al palentín Gregorio Ceruelo, firmante del Manifiestu de los Perses, nómenlu obispu d'Uviéu accediendo al cargu en setiembre y torna a la xoven diócesis de Sanander Rafael Menéndez de Luarca en pasando los años de la Guerra Penisular. En xeneral, los cargos anteriores a 1812 tornen a los puestos como l'alcalde de Sanander Rodríguez de la Guerra y destrúyense tolos monumentos o plaques que recuerden la Constitución gaditana y tamién vuelve reimplantase la odiada Inquisición.

Londres celebra especialmente esti añu la derrota de Francia. El Príncipe Rexente Xurde, exerce formalmente la corona en llugar de so padre'l rei que ta demente y promuévense les expediciones per África a través de sociedaes como la African Society que llueu convertiráse na Royal Geographical Society. En 1815 publícase'l primer mapa xeolóxicu del Reinu Xuníu y de 1815 ye tamién esti mapa auténticu d'Asturies qu'ilustra estes llinies y del que soi propietariu yá que tuvi la ocasión de compralu na Royal Geographical Society de Londres en Kensington Gore y qu'agora comparto con tolos llectores.

Xaviel Vilareyo
FUSIÓN ASTURIAS