LA PROPIEDÁ CÉLTICA N'ASTURIES

LA PROPIEDÁ CÉLTICA N'ASTURIES

Xaviel Vilareyo y Villamil

El Derechu xermánicu engloba tol conxuntu de normes , usos y costumes xurídiques propios de los pueblos xermanos indoeuropeos. El procesu de formación y desarrollu del Derechu xermánicu manifiéstase a lo llargo de más de tresmil años culminando a fines del sieglu IV antes que la presión sobre les fronteres de Roma y el contactu con otres sociedaes romanizaes o cola mesma cultura romana llevara a los pueblos centroeuropeos a una cierta asimilación o mestizaxe cultural. Ello fizo que munchos pueblos xermanos adoptaren dos de les manifestaciones más importantes de la cultura romana comu yeren l’alfabetu y el Derechu de Roma.

El conocimientu de la vida xurídica de los xermanos comienza a través de los datos aportaos por Xulio César y por Tácito pa les époques más antigües y principalmente pela normativa llegal promulgada y pola documentación xurídica de los reinos xermánicos o bárbaros nos que s’esgaya l’imperiu romanu occidental dende’l sieglu V. Ún d’estos pueblos xermánicos ye la nación sueva, a la que Tácito na so obra Xermania, dedica una especial atención . Otru reinu xermanu, el de los Visigodos, tamién s’estableció na península Ibérica a partir del sieglu V. Estos dos pueblos remanecieron comu entes políticos estremaos hasta l’añu 585 cuandu’l rei visigodu Leovixildo los xune baxo’l mesmu poder.
Leovixildo, siguiendo a otros reis anteriores a él, promulgó un códigu de lleis revisando en ciertu sentíu los d’Eurico y Teodorico del que nun conocemos exemplar dalgún.
Nel añu 654, Recesvinto publicó , depués de revisada pol Conciliu VIII de Toledo, la más
importante obra del Derechu xermánicu hispanu: el Liber Iudiciorum o Fueru Xulgu.

El Liber ye una recopilación de lleis promulgaes hasta’l 654 polos reis visigodos, y anque nél predomina la influencia de la tradición xurídica romana, consérvense instituciones de raigame estrictamente xermánica. El Liber tuvo dos revisiones oficiales posteriores pero tamién foi oxetu d’alteraciones por xuristes anónimos. Frutu d’estes alteraciones ye la versión “vulgata” del Liber, escrita yá en romance que de xuru foi la más difundida. El Fueru Xulgu tuvo vixencia en tola Edá Media incluso depués de la invasión islámica, especialmente dientru del naciente Reinu d’Asturies, yá que sin dulda, el Fueru Xulgu foi la más importante obra del Derechu escritu visigodu.

- 1 -

La propiedá colectiva nel Derechu romanu

El conceptu de propiedá comunitaria indivisa conozse tamién comu propiedá céltica o xermánica al ser esti un tipu de dominiu característicu del Derechu de los antiguos pueblos celto-xermanos.
Sin embargo, les diverses formes comunales de manifestación o exerciciu de la propiedá nun
tuvieron bona tradición xurídica nel Derechu romanu que sólo reconocía formes concretes de propiedá más compartida que comunal comu yeren el condominiu o el consorciu. En xeneral el Derechu romanu concebía la copropiedá comu un conxuntu o amestadura de propiedaes parciales y comu una situación polo tanto inestable que se podía solucionar por mediu de la voluntá de los copropietarios.

Esta negación conceptual de la propiedá colectiva qu’establez el Derechu de Roma, especialmente a través de los primeros xuristes xustinianeos, alviértese incluso nel propiu modu d’accesu a ella. Asina, el condominiu podía orixinase pola voluntá de los propietarios en xuntar les sos propiedaes o bien por circunstancies ayenes a la voluntá d’ellos comu por exemplu que la cosa común se legara conxuntamente a dos o más persones.

Los xuristes romanos entendíen que la cosa común alcontrábase idealmente dixebrada en tantes porciones comu copropietarios tuviere y que’l derechu de partición de la cosa común
podía solicitase por cualquiera de los condóminos.

La propiedá nel Derechu de Roma entendíase básicamente comu un derechu individual y esclusivu. La copropiedá polo tanto, al concebise comu una suma de propiedaes individuales, nun esistía comu tal y lo que se noma asina son en realidá unos derechos abstractos establecíos pa dar respuesta a situaciones colectives de dominiu que se daben na práctica. Según un principiu romanu, nun ye posible la esistencia d’una propiedá exercida por varios individuos sobre una mesma cosa, o según palabres del Celso: duorum in solidum dominium esse non potest.

La primer figura de condominiu que reconoz el Derechu romanu ye’l consortium inter fratres o consorciu ente hermanos establecíu en morriendo’l pater sobre una comunidá universal de bienes heredaos. Nun principiu, el consorciu yera una propiedá indivisa más al estilu xermánicu onde too pertenez a toos y el poder de disposición sobre la cosa sólo se ve limitáu por derechu del otru condóminu a prohibí-ylu. Sin embargo, el réxime del consorciu nun esiste yá na época clásica (períodos republicanu y primera dómina imperial) onde predomina yá el réxime d’exercer el dominiu a instancia de parte: cada condóminu puede disponer con llibertá de la so cuota abstracta enayenándola o gravándola. Los frutos orixinaos durante la situación de condominiu fainse tamién comunes pero siempre en proporción a cada cuota de propiedá.

Considerada la communio o propiedá en común comu un estáu transitoriu, puesto que se consideraben nulos los pautos fechos pa establecer condomimios a perpetuidá, cada sociu o dominus puede pidir en cualquier momentu la partición de la cosa común mediante la actio communi dividundo. Si la cosa ye físicamente dixebrable el xuez adxudica a cada dueñu una porción y si ye indixebrable, viéndese a un terceru repartiendo llueu el preciu o bien adxudícase a unu de los condóminos, condergándolu a pagar a los demás la suma de dineru equivalente a cada cuota.

La dialéctica ente los Derechos xermánicu y romanu

Consideramos comu puntu de partida que la discusión sobre una posible confrontación ente’l Derechu xermánicu y el romanu puede dar llugar a conclusiones ermes de conteníu especialmente si enfocamos la cuestión nes fontes de producción normativa. Si bien suel identificase el Derechu xermánicu comu un ordenamientu básicamente orixináu y manifestáu a través de normes consuetudinaries y polo tanto contraponiéndolo al Derechu romanu, de tipu más formalista y llegal, nun creemos que seya ésti l’aspectu principal nesta dialéctica. Y ello porque les fontes de producción o manifestación del Derechu de tipu consuetudinariu per un llau o bien otorgáu por escritu dende xefatura rexia danse por igual nos dos sistemes xurídicos. D’otra banda, los dos Derechos convivieron n’Europa compartiendo espaciu y influencies y si bien el Derechu romanu, comu la cultura de Roma, terminó adoptándose polos propios pueblos xermanos, lo cierto ye qu’Europa esperimentó un procesu llargu y lentu de mestizaxe cultural de tou tipu. Si bien los pueblos xermanos fueron asimilando el Derechu romanu o la llingua comu instrumentos propios ye tamién cierto que’l Derechu de Roma foi perdiendo parte de la so pureza y evolucionando acordies cola idiosincraisa de los pueblos o de los reinos xermánicos nos que se desendolcaba y amestándose coles nueves filosofíes cristianes o teocrátiques que predominaben na Europa medieval.

La península Ibérica, sobremanera la Hispania citerior, foi ún de los espacios más fuertemente romanizaos tanto llingüística comu xurídicamente, calteniendo esta característica incluso durante y depués de la etapa de dominiu islámicu. Sin embargo, na Alta Edá Media produzse en tierres ibériques una tendencia xeneralizada hacia un resurdimientu del Derechu consuetudinariu xermánicu. Dellos autores, ente ellos Claudio Sánchez Albornoz, Pérez Prendes, Ficker y Hinojosa, desarollaron teoríes pa desplicar lo qu’ellos consideraben fonda xermanización del Derechu consuetudinariu ibéricu na Alta Edá Media. L’estrechu parentescu de delles instituciones civiles, penales y procesales coles d’un Derechu xermánicu específicu: el noruego-islándicu, desplicábenlu comu resultáu de la mesma procedencia étnica xermano-escandinava de los pueblos xermánicos peninsulares. Hai que considerar qu’el Derechu consuetudinariu xernamo-visigodu caltúvose paralelamente al so Derechu llegal escritu, sobreviviendo incluso depués de la desaparición del Reinu visigodu durante los sieglos VIII al XII especialmente nos territorios non sometíos al Islám.
Otres teoríes afirmen que comu la Monarquía goda, mui romanizada, yera’l principal frenu pa la espansión del Derechu xermánicu consuetudinariu, ésti xorreció precisamente depués de la caída del reinu nel 711. A partir d’entós, suprimíu l’estáu godu, el Derechu consuetudinariu xermánicu medró ensin torgues naquellos territorios que comu’l Reinu d’Asturies vivieren más separtaos del poder toledanu y dende esa fecha abandonaos a la so suerte.
Nesti contestu naz el Regnum Asturorum o reinu de los ástures nel que’l so primer rex revístese con esi rangu y proclámase comu xefe territorial pola tropa armada, a la manera xermánica.

Distintes hipótesis traten de desplicar cómu’l Derechu consuetudinariu de raigame xermana pudo sobrevivir y incluso difundise nun estáu tan fuertemente romanizáu comu´l
visigodu n’España:

En primer llugar, los visigodos, si bien yeren un pueblu d’orixe xermánicu, adoptaron una cultura fuertemente romanizada ente la que s’incluye una inmersión xeneral nel Derechu romanu. En segundu términu, anque oficialmente adoptaren el Derechu de Roma comu propiu el pueblu del Reinu godu nun llegó a perder dafechu el so Derechu típicamente consuetudinariu y xermánicu. En tercer llugar, la esistencia d’un Derechu llegal romanizante en contraposición a un Derechu consuetudinariu de raigame xermana nun foi tan radical, especialmente nel pueblu visigodu, una nación yá avezada a los mestizaxes col gran imperiu
romanu. Por último, la pervivencia o el remanecer d’un acusáu xermanismu xurídicu na Alta Edá Media puede desplicase bien comu consecuencia del fin del estáu visigodu romanizante
nel que siempre esistía un Derechu xermánicu subyacente o solapáu o bien pol natural resurdimientu d’un Derechu consuetudinariu d’inspiración popular y de carácter ancestral.

De toes formes, la contraposición ente un Derechu xermánicu de tipu consuetudinariu y un Derechu escritu parez incompatible al menos dende una visión actual, pero en realidá esta dialéctica nun debió ser tan radical dende los planteamientos xurídicos, económicos y sociales que se desendolcaben na dómina altomedieval del norte peninsular.

El colectivismu na organización xurídica xermánica

La base en xeneral de la organización xurídica xermánica foi l’articulación de los asentamientos humanos en grandes grupos de parentescu ampliu (Sippe o Sippen, en plural) y en comunidaes comarcales, ente les que se desendolcaba una múltiple vida de relaciones simultanies. En primer llugar llévense a cabu constantes conexiones de vecindá ente eses families o Sippen.
Los llazos grupales refuércense mediante’l Conceyu o Xunta de los varones d’estes families n’asamblees populares pa resolver asuntos de cualquier mena (privada, pública, penal, económica o social...). Estos Conceyos fáinse xeneralmente de nueche, na viesca, durante la lluna nueva y plenurios, con un especial ritu que tien comu ritmu temporal a la lluna.
Nesti mecanismu social subyaz una finalidá de collaboración comarcal ente les diverses Sippen, intentando entamar un nivel superior de xuntura pa la defensa d’intereses o valores que yeren comunes a toos. Esti tipu d’alianza o confederación ente Sippen nomada Lega o Bund, a la vez inspirada por dalguna divinidá, formaba una estructura asociativa lo más asemeyada a la idea d’estáu que la vieya cultura xermánica pudo concebir, yá que nun esistía na Xermania una xefatura única y xeneral de tipu territorial a la manera imperial romana, dao el carácter igualitarista o confederal que formaben les Sippen, los Conceyos y les asamblees xenerales. Xunto a esta idea colectiva y federal tendente a una mutua collaboración nos intereses territoriales, nel Derechu de los xermanos esistía otra forma d’organización social que contradiz a lo anterior que ye la que axuntaba a los guerreros alrodiu d’un xefe carismáticu formando una xerarquía móbil, non lligada a la tierra y motivada por intereses non xenerales sinón personales o de grupu.

La Sippe o sociedá familiar tien una doble dimensión comu círculu parenteral de consanguinidá o de parenteles per un llau y comu estirpe na que s’engloben tolos homes y muyeres descendientes d’un mesmu troncu masculín común del que deriven varies xeneraciones. Trátase polo tanto de llazos de pertenencia familiar y de consanguinidá, non de vida efectiva nuna mesma comunidá doméstica.
La Sippe proporcionaba a los sos integrantes: defensa disuasoria y vengadora, promoción social y personal, amparu en casu de probura, tutela y solidaridá xurídica y moral.

La propiedá comunal nel Derechu xermánicu

La tierra ocupada poles diverses Sippen distribúyese ente dos vínculos o manifestaciones de la propiedá sobre ella. El primeru exércese baxo la potestá del cabeza de familia o Munt y engloba la propiedá familiar más cercana: vivienda, espaciu circundante, güertos o llousas y tierres de llabranza. El segundu vínculu de propiedá abarca a les Sippen en conxuntu y tien comu oxetu afitar los llazos ente elles y solucionar les sos necesidaes, proporcionándo-yos tierres comunales que toos (Allmende) usen y esfruten por igual, pa pastos o aprovechamientu xeneral de recursos comu viesques, madera, agua y ríos, piedra y materiales, minería, caza y pesca...etcétera.
L’efectu xurídicu más importante ye facilitar a tol grupu, comu tal, la plena apropiación directa de la tierra necesaria del contornu o comarcana (Mark), integrando asina la propiedá individual de cada familia cola propiedá comunal na que toos son Genossen, esto ye copropietarios por igual. Destamiente surdirá l’asociación comarcal (Mark-genossenchaft), integradora de tolos campesinos y vecinos del territoriu que, organizaos en conceyu xeneral
(Thing) iguarán los aprovechamientos de les tierres colectives amás de resolver conflictos sobre llendes de parceles ente families y entamarán acuerdos xenerales sobre planes de cultivos, rotaciones ternaries de los mesmos o otres polítiques productives, lo que necesariamente obligaba a una estrecha collaboración grupal.
La guerra y la defensa considerase comu otra actividá colectiva más. Nestes actividaes comunitaries establécense unes relaciones recíproques y de autoayuda de la xente pa les sos empreses colectives. La mentalidá de grupu derivada de too esto, ofrez comu resultáu un Derechu consuetudinariu grupal y familiar. Al par d’ello xenérase una ética social comunitaria con valores y ideales definitorios comu por exemplu la emponderancia guerrera de la llealtá o la fidelidá al grupu. Penriba les diferencies, los pueblos xermanos caltuvieron siempre una fonda conciencia de la so unidá espiritual que se reflexa na homoxeneidá y coherencia de les sos instituciones xurídiques.

Nesti sentíu, el Derechu xermánicu constitúyese comu una parte de la cultura d’estos pueblos, entendiendo la cultura comu’l conxuntu de les pautes de comportamientu social determinaes poles condiciones de vida.

Tácito, na so obra Xermania, documenta d’una forma mui precisa toes estes característiques societaries de los xermanos, ente elles afirma que salvo la ferrería, cuasi carecen d’actividá manufacturera sobre les materies primes, y ésta ye siempre orientada hacia lo utilitario y lo práctico yá que desprecien el valor de los oxetos suntuarios y ornamentales. Nun esiste tradición nestos pueblos d’asentamientos o de vida urbana fuera de les comunidaes aldeanes onde llariguen.

El Derechu de los pueblos xermánicos nun s’orixina nin ye principalmente creáu pola autoridá llexislativa de los governantes comu un actu unilateral de voluntá o soberanía, sinón que ye un conxuntu de normes “atopaes” pola propia colectividá, axuntada en conceyos populares pa reflexionar sobre les soluciones xurídiques adoptaes asambleariamente pa llograr asina que seyan coherentes cola conciencia xurídica xeneral.

D’esti modu surde la idea de que’l Derechu xermánicu ye básicamente un Derechu popular escritu na conciencia social del pueblu, un Derechu consuetudinariu, validáu a través de l’aprobación o del consensu xeneral, y respetáu polo tanto comu una costume social. Les lleis que surden de les asamblees son calificaes tamién comu “populares”, pero col pasu del tiempu la intervención asamblearia y popular va ser cada vez menor, según la sociedá xermana se fai más diversa y complexa, dexando’l llabor llexislativu a comisiones d’espertos o xuristes que preparen los testos que depués los monarques sancionen, si bien perdurará el vezu de la promulgación rexia de les lleis en nome de la xeneralidá del pueblu.