La propiedá comunal nel Derechu civil asturianu

Ún de los aspectos más característicos dientru les normes del Derechu consuetudinariu civil d’Asturies ye’l significáu colectivu que s’establez en dellos derechos de propiedá y xunto a ellos, igualmente a otros usos xurídicos, aprovechamientos comunitarios y ciertes formes especiales de propiedá comunal.
Estes costumes xurídiques y derechos comunitarios son de fonda tradición n’Asturies y dieron llugar al nacimientu d’un estilu de vida colectivu con gran importancia na vida social y económica del país. Ente elles atopamos ciertes formes peculiares nel usu y esfrute de la tierra que se remonten hasta los mesmos oríxenes de la protohestoria ástur, no que se vien nomando comu la propiedá xermánica o céltica. Estes formes de dominiu defínense comu yá s’apuntó enantes comu una propiedá colectiva privada ensin atribución de cuotes o pocentaxes a los condueños, onde too pertenez a toos y les meyores, frutos o rendimientos acrecen a tolos propietarios por igual, constituyendo un exemplu claru de comunitarismu
agrariu de gran significación nes tierres asturianes.
Reglamentaes yá estes normes dende la Edá Media por Ordenances o por fueros locales
pero regulaes sobre too polos usos y costumes, caltiénense güei con gran raigame na conciencia social y lo que ye más importante conserven na actualiudá una perimportante función económica y bien d’efectos y beneficios prácticos.

Dientru d’estes formes especiales de propiedá xermánica o colectiva alcuéntrense los montes vecinales en manocomún, un patrimoniu privativu de carácter forestal que pertenez a una colectividá concreta de vecinos que tienen derechu a la so esplotación, usu y esfrute de forma mancomunada. Similar a esta forma dominical ye la propiedá a monte y villa, asina comu los nomaos términos bravos y términos vareables.
Paralelamente a estes formes de propiedá, el Derechu civil asturianu ufierta un conxuntu
de derechos comunitarios, usos y aprovechamientos colectivos o mancomunaos de bienes y otres formes especiales de comunidá o d’esplotación comunitaria de la tierra.

Podríemos axuntar el Derechu civil asturianu enderredor de dos pegoyos definitorios del so carácter y función comu son, per un llau, la unidá del patrimoniu familiar y de la familia en sentíu ampliu y per otru, les instituciones que respuenden a un sentíu comunitariu o colectivista nes relaciones económico-sociales.

Ensin intentar facer nenguna hipótesis determinante sobre l’orixe del Derechu consuetudinariu asturianu, diremos simplemente que la propiedá y usos colectivos de la tierra yera un rasgu característicu del sistema dominical de los pueblos celtes que asitiaron nel centru y nordés de la península ibérica y nun parez del too desacertao allugar equí los posibles primeros oríxenes de la propiedá comunal asturiana o incluso los comienzos del propiu Derechu consuetudinariu asturianu.