miércoles, 7 de agosto de 2013

Los Vándalos




Los vándalos






La llegada de vándalos al noroeste peninsular nel 409 da pasu a otra etapa más pacífica. La parte occidental quedaba pa los suebos (lucense y bracarense) mentantu que la oriental quedaba pa los vándalos hasdingos (asturum y cluniense). La división ente suebos y vándalos pautóse nel ríu Eo (Pedrafita de Camporredondo) siendo la llende divisoria ente suebos y vándalos. Los suebos aspiraben a espansionase más pal Este pela meseta y nel 419 los vándalos al mandu del rei Gundericu ataquen a los suebos d’Hermerico ganándolos nuna batalla nel Bierzu (Nerbasis) y asedien la capital sueba, Braga. Pero na práctica el territoriu vándalu quedó desprotexíu, abandonáu a los sos habitantes, siendo la Ilesia arriana la única institución vertebradora y adminsitradora del territoriu tresmontanu.  El desaniciu de la monarquía vándala nel norte nel 429 y l’abandonu de les tropes romanes dexaron al noroeste peninsular ensin nenguna autoridá. El dominiu suebu na cornisa norte de peñes a la mar foi nula dafechu.

En realidá esti territoriu ta organizáu y defendíu militarmente por una organización vándalo-autóctona y estructuráu internamente dende’l sieglu V por una Ilesia arriana propia. Esti estáu d’independencia frente a los visigodos durará trés sieglos. Los intentos de conquista visigoda del norte entamaron con Sisebutu pero’l dominiu nunca se materializó. La fastera norte atlántica nunca foi visigoda. Esti fechu favoreció una integración interna relixosa ente los territorios tresmontanos que van del Eo al Nervión (Totas Asturias per flumen magnum Ove usque Biscayam). Consolidóse un poder eclesial centráu alrodiu de Lucus Asturum como tiesta monástica que non sólo daría nome al territoriu atlánticu de peñes a la mar, dixebrándolu como corónimu frente a la meseta  visigoda, sinón que facilitó el desarrollu d’una poderosa aristocracia autóctona.



Cola llegada de los vándalos a Lucus Asturum peracaba la dominación del imperiu romanu nesta Asturia y entama la definitiva cristianización (arriana) y desromanización. Los vándalos van amestase cola población autóctono. La güelga de los vándalos na Asturia de Lucus Asturum foi fonda. La presencia vándala continuó. Los vándalos traxeron la relixón cristianoarriana. Non sólo nun desanicien Lucus Asturum sinón que la favorecen revitalizándola. Nomes vándalos son: Salas, Frexulfe, Fafilán, Sama, Godina, Gudín, Guimarán, Gauzón, Guarda, Taramundi, Sariegu, Siero, Suarón... Gaudiosa, Salamino, Gomesindo, Guimara-Vimara, Hermesinda, Leminio, Ausano, Bermutus, Hordonius, Fáfila... tapín, llata, gabitu, estaca, amagar....

El reinu de Gundericu n’Asturia duró unos vente años (409 – 428)  asentándose sobre Lucus Asturum nel norte y Astúrica nel sur. Lucus Asturum sedría  de nuevo un centru rector nel norte, dominando un llargu territoriu d’Este a Oeste nomáu por ello Asturia. L’ayalga de monedes d’oru romanes atopaes en Chapipi (Grau) y formáu por 14 piezes tardo-romanes del 379 al 423 són prueba d’una fuxida ante la llegada violenta de la invasión vándala. La so incursión vendría pel sur per La Mesa o Memorana. La esistencia d’un primer monasteriu cristiano-arrianu de Lucus Asturum nun nos consta, siendo l’arrianismu oficialmente una herexía, pero conservamos dos monasterios-ilesies: Santuyanu y Santa María de La Vega, propiedaes reales restos de templos anteriores. Itacio escribió que los vándalos “fundaron” una ciudá col nome de Lugo n’Asturies, en realidá “refundándola” sobre pegoyos cristianos: fundaron un monasteriu principal nel que l’abá exercía les funciones d’un obispu superior que presidirá toa una rede subordinada de monasterios. Esta yera la forma d’organización arriana y tamién la d’Irlanda, de tipu monásticu, diferente del modelu romanu. El monasteriu vándalu de Lucus Asturum yera la tiesta principal d’una rede eclesiástica dende’l sieglu V nun espaciu que güei nomamos “Les Asturies”. El Liber Itacii noma como reis a Gesericus (428-477), Hunericus (477 – 484), Gundamundus (484 – 496), Trasamundus (Isoris 496 – 523) y Gelimerus (Guimel 530 – 534). Gundericu sedría asina el primer rei d´Asturies de la estirpe vándalo-hasdinga.


Si nel sieglu V hai un obispáu d’Astorga nel sur que termina onde entama otra Asturia tresmontana de Lucus Asturum. Pal occidente d’esta Asturia atopamos l’obispáu de Britonia-Mindoñéu dende’l sieglu VI y pal oriente ta l’obispáu de Calagorra hasta’l Valle de Gordeyuela incluyendo Llantero, Arceniega, o Güeñes (Valmaceda) mentáu primeramente nel 463. L’espaciu eclesial con centru en Lucus Asturum va conocese como Asturia del Eo al Mena. Asturies, como la entendemos agora, ye una creación eclesial del sieglu V que comprendía un territoriu que tenía por centru organizativu a Lucus Asturum.









No hay comentarios:

Publicar un comentario