NOTA PÚBLICA

Quiero manifestar públicamente el mio rechazu y la mio oposición a la utilización illexítima del mio nome y apellíu, utilización fecha contra la expresa prohibición mía, pa la realización d’una interesada “encuesta” sobre l’estándar del asturianu entamada polos señores Don Ramón d’Andrés y Don Xuan Santori que se publicó de recién. Afirmo una vegada más que les Xuntes d’Escritores coordinaes en 2005, 2008, 2010 y 2012 nun cuntaron con nengún tipu d’ayuda económica de dineru públicu pa la so organización y que toes elles entamáronse a través d’una convocatoria pública fecha durante meses previos convidando a tol mundu interesáu ensin discriminaciones de nengún tipu a participar activamente nelles. Frutu d’esos alcuentros la editorial Trabe asoleyó dos llibros d’actes en 2007 y 2009 llueu de recibir esta empresa dos suvenciones de la Conseyería de Cultura y Turismu, dineru que nin yo como coordinador nin naide de los participantes recibió un solu céntimu. La editorial Trabe cedió 25 exemplares de los mesmos que se repartieron gratuitamente ente los participantes y asistentes. Mui al contrario, otres actuaciones d’esa mesma Conseyería del PSOE, ante los presuntos casos d’usu fraudulentu y prevaricador del dineru públicu presupuestáu alcuéntrense anguañu siendo investigaes polos Tribunales de Xusticia. Los intentos de xustificar interesadamente la política cultural y lúdica de les Conseyeríes del PSOE y la so xestión sospechosa sobre los recursos públicos por extrañes votaciones realizaes por individuos protexíos políticamente, favorecíos materialmente y privilexaos personalmente que sí se beneficiaron d’ella y del so escurantismu resúltenme del tou patéticos y rechazables. Tamién denuncio y nun comparto esi afán enfermizu por desacreditar y desprestixar siempre a l’ALLA y al so estándar, cuando los culpables del desaniciu llingüísticu y cultural que padez Asturies siempre foi y ye culpa de los goviernos que la malgovernaron nestes décades que fueron prácticamente toos del PSOE apoyaos pola IU. Les persones que vivimos del nuesu dineru o trabayu personal  y nun tenemos qu’agradecer nada a nenguna Conseyería, a negún partíu nin a nengún padrín conseguidor, somos más llibres pa esixir los nuesos derechos cuando éstos s’alcuentren vulneraos ya inda más cuando nos atopamos con indefensión, marxinación y desamparu. En cambiu les persones serviles, que viven o pretenden vivir de los favoritismos políticos, de les prebendes del poder, enchufes o amiguismos y de les suvenciones publiques presupuestaes que pagamos a la fin toos y toes siempre serán siervos de la so propia indignidá yá que la mano mafiosa que da de comer siempre pide obediencia, sumisión, sectarismu y complicidá indignes, intentando cuasi siempre emporcar a los que los arrodien coles sos propies miseries, servidumes y espúreos intereses.

The eyes of corruption

can only see

their own overthrown and desmay.

Xaviel Vilareyo

Uviéu, 4 de setiembre 2013.