El tueru nadaliegu nes Asturies

El tueru nadaliegu nes Asturies

Xaviel Vilareyo

El Carbayu ye l’árbol sagráu de la cultura celta por antonomasia. Tamién lo yera’l Texu y por estensión munches otres especies arbories tamién lo yeren pues taben asociales a elementos de lo divino. Presente en munches cultures, la figura del Carbayu remanecía como testigu nos xuramentos especialmente importantes, pues cuando les normes yeren toes consuetudinaries yera en presencia del sagráu Carbayu onde se solía xurar o bien onde s’impartía xusticia en conflictos ente tribus o persones de la dómina pésica, cántabra y llugona. De fechu, la presencia de carbayos y texos ye frecuente n’abondos llugares señalaos de Les Asturies, tanto nes Asturies de Santiyana, de Tresmiera y d’Uviéu como por exemplu cabo hermides o ilesies onde se solíen facer les xuntes vecinales, los xuicios de paz o los nomamientos o xures de cargos públicos. Nalgunes ocasiones a esti árbol suel llamase l’árbol del Conceyu, onde tuvieron llugar les primeres xuntes municipales asturianes. Anque se tarazara l’árbol queda recuerdu del sitiu onde taba y al llau del cual se ficieron les primeres xuntes conceyiles. Asina, el Carbayu o Texu facía la función de testigu sagráu de lo promulgao otorgando polo tanto respetu y autoridá a tolo que se votara o sancionara nesi llugar santu.

Otra de les divinidaes principales pa los celtes yera’l Dios-Sol adoráu baxo munchos nomes o formes en diferentes llugares de la celtia europea. La fiesta del Dios-Sol coincidía col solsticiu d’hibiernu que según la tradición ye’l día 13 d’avientu, cristianizáu como fiesta de Santa Llucía. Esta fecha marca’l comienzu de l’ascensión del sol y de la lluz solar nos cielos. Yera polo tanto la Fiesta del Nacimientu de Sol (Yule) pero non la del comienzu del Añu Nuevu que yera'l primeru de payares (Samhain). Nesta fiesta del Sol yera vezu quemar un pequenu árbol o tueru adornáu con frutes, piñes o cintes de collores n’homenaxe al Dios Sol y celebrando la llegada de la nueva lluz solar y el crecimientu de los díes frente a les nueches. (Per Santa Llucía mengua la nueche y crez el día)

Esta cultura celta pervivió n’Asturies como un residu d’antiguos ritos paganos d’adoración al Sol en forma de tradiciones como la quema del Tueru Nadaliegu. Efctivamente, la nueche del solsticiu quemábase un tueru bien de carbayu, texu, carrascu o otres especies, con rames adornaes o tronzáu dafechu nun gran trozu de madera, pa celebrar la lluz del Sol. Otra alternativa en llugar de quemar l’árbol yera adornalu con lluminaries durante la nueche pa recibir con alegría el nacimientu del nuevu Sol. Nes Asturies solía preparase pa la nueche del solsticiu un gran tueru de Texu o de Carbayu que prendía nel llar y se dexaba quemar durante tola nueche. Los restos del tueru sagráu al otru día solíen guardase como recuerdu y amuletu pa protexer la casa. El Tueru de Nadal considerábase tamién como un regalu de prestixu ente l’alta sociedá.

Esta tradición ta perespardía en munchos países d’Europa del norte y siempre asociada con ciertes variantes al actual “árbol de Navidá”. Nunos casos l’árbol préndese sólo con lluces o veles, notres ye l’árbol enteru el que se prende na plaza del pueblu o bien consérvase ensin quemar como anguañu. Otres veces préndense simplemente fogueres con tueros o formando conos o árboles que se prenden. Son importantes tamién pa la tradición los personaxes de los lleñadores, los que corten los tueros o árboles de Nadal (L’Esteru) y que tamién son mañosos fabricando coses de madera, una figura tradicional asturiana precursora de los actuales Santa Clauss. Modernamente la tradición evolucionó hacia fabricar dulces o pasteles en forma de tueros allargaos (Francia, Portugal) pa celebrar esta fiesta. En Suecia son mui típicos los candelabros de trece veles en forma d’árbol que se prenden el día de Santa Llucía (13 d’avientu) y les procesiones con corones vexetales y veles que representen al Sol y otros acompañantes que representen a les constelaciones d’estrelles. Por supuesto esta fiesta tamién ta asociada a la gastronomía de los dulces caseros, los regalos y les bones comides que siempre presten más a la reciella. Un día dafechu familiar, de regalos y felicitaciones mutues porque la época de la escuridá yá pasó felizmente pa toos. L’asociación colos regalos pa los neños vien porque de les rames del Tueru Nadaliegu tamién podíen colgase o atase pequenes rosquíes,  dulces o galletes de tou tipu que yeren la delicia de los más pequenos, y d’atar rosquíes al árbol pásase a colgar pequenos regalinos como collares, abalorios, o paquetinos”sorpresa”. La felicidá completa... un día de dulces y regalos. Esta tradición de les rames adornaes con galletes o rosquíes sigue viva en munchos llugares de Les Asturies a través de la ufierta de ramos adornaos asina y dedicaos a les vírxenes sobre les que se suelen rozar o pasar sobre les imáxenes santes pa asina bendecir los ramos engalanaos. El famosu “ramu” en forma de conu que se puya el día de la fiesta del santu en tantes parroquies de Les Asturies ye un asemeyu d’esta fiesta del árbol-tueru de Nadal que s’adorna con dulces y cintes, ye en fin una variante más d’una mesma tradición. Curiosamente conserva el nome arboreu de “ramu” pero non la forma de ramu sinón más bien anguañu ye un especie de pirámide pesada adornada con panes dulces, cintes y flores de collores. Dende que la Ilesia católica pasó a celebrar el nacimientu de Cristu el día 25 sustituyendo asina el día del cultu a Mitra, les asociaciones festives del tueru y del árbol nadaliegu pasen a concentrase nesti día. Más modernamente ye frecuente asina l’usu de tueros afuracaos pa facer cueves y representar belenes o nacimientos de Cristu dientro d’ellos.