La Navidá pudo ser celebrada un trece d'avientu
El
trece d'avientu la ilesia católica celebra a Santa Llucía, la fiesta de la
lluz. Efectivamente nos países celtes nórdicos el 13 d'avientu celébrase la
llegada del nuevu sol, siendo'l día 12 la nueche más llarga del añu, el
solsticiu d'hibiernu, o Yule, surdiendo al día siguiente un nuevu calendariu
del ciclo solar cuando'l día entama a crecer frente a la nueche. La tradición
popular asturiana dizlo claro: Per Santa Llucía mengua la nueche y crez el día.
Esta tradición del día trece como día del
nacimientu del sol ta muy viva en munchos países nórdicos como por exemplu en
Suecia, onde la fiesta celébrase con ritos de prendimientu de fogueres,
procesiones con corones de veles enceses y lluminaries en toles cases que dan
la bienllegada al nacimientu del sol. El cultu al dios-sol yera mui estendíu
non sólo ente los proto-celtes y celtes sinón perende los continentes (Exiptu,
Estremu Oriente o América). La metáfora del nacimientu del dios-sol col
nacimientu d'un neñu taba mui presente nel imaxinariu de los pueblos antiguos,
esto ye, que la Diosa Celestial parió un neñu el 13 d'avientu que ye'l sol. Así
entenedíenlo por exemplu los exipcios con ritos de presentación de neños recién
paríos al sol nesti solsticiu.
Nos
pueblos proto-celtes y celtes esi día tenía otros rituales como l'adornu de
cases, puertes y ventanes con decoraos vexetales a base de riestres d'acebu y
arfueyu pa protexese de malos presaxos o visites y pa deseyar bona suerte.
Antes de la nueche del día 12 tarazábase un tueru d'un árbol con rames que
tamién se decoraba con piñes y llazos y que se quemaba la mesma nueche del
solsticiu, el día 13 d'avientu (l'árbol de Nadal). Esta costume ancestral
sobrevive na tradición asturiana del Nadaliegu, un gran tueru d'árbol que se
pon nestes feches anque actualmente ponse xunto a llares o belenes y tamién se
quema pa celebrar la llegada del sol.
La
ilesia cristiana dende un principiu y ante la falta de datos sobre'l día esactu
del nacimientu de Xesucristu celebraba esta fiesta el día 6 de xineru, fecha
qu'indagüei siguen celebrando los ortodoxos como la natividá de Cristu.
El
calendariu xulianu antigu computaba el solsticiu del hibiernu el 13 d'avientu
pero posteriormente cambiose'l calendariu xulianu faciendo coincidir esta fecha
col 25 d'avientu, esto ye cola actual "Navidá" o natividá de Cristu. La
razón foi que munchos cristianos siguíen celebrando práctiques y ritos paganos
d'adoración al nacimientu del sol-Xesús durante'l mes anterior, n'avientu, los
díes 13 y 25 d'avientu.
La Ilesia católica ante tanta confusión y
restos de paganismu y viendo que la fechac del 6 de xineru nun tenía raigañu
tradicional o popular pa les poblaciones y pueblos estremaos decidió tomar les
riendes y suplantar nun sincretismu les fiestes paganes del sol pola Navidá. La
dulda taba entós ente escoyer el día 13 o el día 25 como día del nacimientu del
sol, de la lluz y pol tanto del dios Xesús, como sol o lluz del mundu.
Les
razones de la escoyeta del día 25 en llugar de la del día 13 que yera la fiesta
popular europea de les lluminaries n'honor al dios sol ente celtes y
proto-celtes débese a les influencies orientales nel cristianismu oficial
frente a la tradición nórdica o céltica europea que celebraba efectivamente el
día 13 como la fiesta del sol.
El
pesu de la tradición oriental na Ilesia cristiana inclinó la balanza hacia'l
día 25, relegando'l día 13 a Santa Llucía, una santa de la lluz sí, pero una
santa menor y secundaria en comparanza col nacimientu de Xesús. La razón foi
los cultos persistentes n'oriente al dios Mitra que yera conocíu como
l'invencible sol y la so natividá caía un 25 d'avientu. Asina, la cultura celta
europea quedaba relegada por una mayor presencia d'elementos culturales
orientales asiáticos provinientes d'oriente como'l cultu a Mitra. El cambiu
posterior nel calendariu xulianu fizo polo tanto coincidir el solsticiu col día
20-25, relegando a la cultura popular europea d'anguañu a un residu folk.
FELIZ
DÍA DEL NACIMIENTU DEL SOL
FELIZ
13 D'AVIENTU
Xavi Vilareyo y Villamil
No hay comentarios:
Publicar un comentario