El camín d’inquietú ye un proyectu echáu a andar a lo llargo de dos años qu'algama un primer peldañu con esti VIII Premiu Elvira Castañón de poesía n'asturianu 1999. Un camín difícil, fechu pasu a pasu, albentestate, infinitamente llenu de borrina, torgues, cambios de paisaxes y climes, pero tamién de fonda gratitú: el camín de la lliteratura, de la poesía, el camín de los díes ensin repasu, el camín de tirar siempre p'alantre na busca inquieta, ensin reposu, ensin desánimu, a la gueta del mundu, del pensamientu, d'unu mesmu, el camín de nunca parar, de vivir y escribir el pulsu de la poesía. Nesti camín alcontramos referencies al paisaxe xenerosu que la nuestra Tierra nos regala pero dientru d'un sentimientu de perda o más bien d'arrincamientu inxustu del propiu ser vital, la visión d'un país esfechu, abandonáu, solu como nós en mitá del mundu, o quizá entá por refacer. Un camín que torna la mirada nueva pa la casa vieya, la casa del padre, de la madre, la patria de nós. La compasión personal cola tierra sola acompaña esti camín en solitariu, los pasos perdíos dientru de la inmensidá son la penitencia impuestá por siguir esti camín fatídicu, l'esiliu na propia tierra, la tortura de la señaldá y de la posible perda de la propia esperanza. La llucha por siguir ensin desánimu nesti camín ye lo que nos va permitir alendar con fuerza, reposar y suañar, na nueche, nel mar, aselar un poco p'acollumbrar los rellumos del recuerdu, facer un altu nel camín pa güeyar tranquilo la mar, y siguir llueu viviendo nuna sienda que nun para. Esi camín que picó una vegada nuna puerta y nos echó pal mundu colo puesto.
"Que meyor ye caleyar que quexase polo andao."
Esti ye'l mio camín d'inquietú.
Xaviel Vilareyo
Xaviel Vilareyo premiu Elvira Castañón
de poesía n'asturianu
Xaviel Vilareyo recibió el pasáu vienres 30 d'abril el VIII Premiu de Poesía Elvira Castañón pol so poemariu n'asturianu tituláu El camín d'inquietú, un llibru que recueye 22 poemes.
L'actu d'entrega d'esti premiu patrocináu pol Conceyu d'Ayer
cellebróse nel salón d'actos de la Casa Cultura de Moreda con presencia de representantes municipales y de la xefa de Política
Llingúística Dª Celsa Barbón.
Darréu del actu d'entrega entamóse un recital poéticu siguíu por un
recital de música celta asturiana a cargu del tríu musical presidíu pola gaita de Santi Caleya.
Xaviel Vilareyo nació en Mieres del Camín en 1967, ganador tamién de
los premios Valentín Andrés, Xeira y Vila de Sarria ye tamién escritor en llingua galaicoasturiana. Tien publicaos los llibros de poemes Cróniques del recuerdu y Más que probable, asina como dellos relatos y ensayos per revistes asturianes y hespañoles. Aparez tamién en recientes esbilles poétiques colectives. Publicó tamién el so Manifiestu sobre la poesía ética.
El camín d'inquietú ye una travesía lliteraria, un cantu a la tierra y a los caminos duros y difíciles de la poesía, una mirada al frente nos trayectos pinos y solitarios qu'empobinen a esa patria de la señaldá que ye la creación poética.
Esti llibru de poemes de Vilareyo publicóse pola Editora del Norte nel 2001 y cunta con una dedicatoria a la oficialidá de la llingua asturiana.
No hay comentarios:
Publicar un comentario