domingo, 3 de julio de 2011

La propiedá inmobiliaria nel Derechu xermánicu

Na propiedá inmobiliaria xermánica les facultaes de disposición (de venta, arriendu...etc)
pertenecen a los grupos ( families o Sippen) de manera que sólo la totalidá de los componentes de les Sippen y les asamblees comarcales pueden disponer sobre los terrenos comunales o Allmende. Per otru llau los integrantes de la comunidá familiar pueden disponer de la propiedá sobre les sos cases, güertos y terrenos privativos aplicando pa ello la fórmula de l’actuación mancomunada.
Si se disolviere la propiedá común, cada comuneru o mancomunáu adquier efectividá xurídica sobre una parte alícuota d’ella. Mentantu nun se produza esta división cada comuneru que fine acrece cola so cuota a los restantes, salvo nel casu de tener fíos que puedan subrogase nel so derechu.
Toos y caún de los individuos integrantes de les families y grupos pueden aprovechase y esfrutar de los Allmende. Los aprovechamientos específicos complementarios a la esplotación de la tierra comu por exemplu los de les agües, pesca, viesques, caza, sal o minería, ordénense de manera que la esplotación resulte coherente cola propiedá inmobiliaria atribuída a les diferentes colectividaes.
Los grandes ríos y la mar yeren propiedá popular común; los de rendimientu más reducíu yérenlo de los conceyos comarcales yá que formaben parte de los espacios del Allmende,
y per último los pozos, fontes, preses o estanques que tuvieren en terrén de la comunidá familiar yeren propiedá d’ésta. La pesca iguóse del mesmu modu en caún d’estos trés tipos d’espacios.
Les viesques y montes que s’ocupaben considerábense de propiedá popular colectiva y podíen incorporase al Allmende y aprovechase por toos. Nes biesques del pueblu podíen cazar toos; nes de los conceyos comarcales sólo los miembros d’éstos y nos terrenos familiares los integrantes del grupu familiar. Tamién la collecha del sal y la riqueza minera siguía los mesmos criterios.
Los monarques al dir consolidando la so potestá consideráronse representantes del pueblu
faciendo por apropiase de los derechos que correspondíen a ésti. Surdieron les regalíes o facultaes esclusives de los reis lo que motivó la necesidá d’autorizaciones rexies p’aprovechar ciertos terrenos o bien la posibilidá de donaciones reales a los súbditos de los terrenos en sí o sólo del so aprovechamientu.
L’adquisición de la propiedá inmobiliaria fáise per ocupación, entrega o herencia. Nun conocíen la idea d’expropiación yá que nesti contestu socio-xurídicu nun tenía sentíu.

No hay comentarios:

Publicar un comentario