UN APUNTE SOBRE LA POESÍA ÉTICA

UN APUNTE SOBRE LA POESÍA ÉTICA

Xaviel Vilareyo y Villamil

Una de les entrugues que más nos facemos los escritores ye pa qué o pa quién escribimos. Dientro de les posibles respuestes podemos camentar qu’escribimos pa nós mesmos o bien pa los demás y personalmente prefiero la segunda opción yá que cuido que nun esiste la poesía si ésta nun aporta o llega a los demás, seyan munchos o pocos los destinatarios. Entendida asina la poesía como una función esencialmente comunicativa vien a cumplir l’arte poética un valor social ya ideolóxicu de primer orde que se manifiestao se manifestaba na emponderación social y romántica de los poetes encumaos a la categoría de portadores o voceros d’un especial sentimientu, sensibilidá y valir social. La crisis de los poetes anguaño perceptible explicase pola propia crisis social de la poesía, rebaxada güei día del so tradicional pedestal social a un nivel de lo personal, lo íntimo, lo d’andar per casa cuando non de lo initelixible o lo quimérico. Rescatar l’antigu y prestixosu valir social y comunicativu de la poesía cuido que debiera ser el llabor actual de los poetes, enxertando la so propia voz a otres voces y sentíos que nun tienen por qué ser yá los de la so persona o la so vida, interesante si cabe pa él, pero non ya pal conxuntu d’una sociedá o d’un mundu enteru. Tanto la poesía del absurdu como la nomada poesía de la experiencia contribuyeron sobremanera a un claru alloñamientu de la sociedá hacia la poesía y lo poético por alloñase precisamente esta poesía de les esmoliciones del conxuntu de la sociedá y por tratar d’insistir nes mires personales del propiu poeta.
Ye polo tanto necesario tornar a rescatar la poesía d’esti olvidu social y colectivu nel que cayó hai yá abondos años frutu d’una escesivu afán de personalismu esperiencial y vivencial de los poetes y alllugala na so función propia ya hestórica como calce de reivindicación, de referente éticu y cívicu y d’estética comunicativa pa la que se creó. Camiento que la poesía basada na experiencia personalista tan de moda nos años 80 yá algamó un final na nueva poesía de la xeneración de los 90. Yá nun sirve falar de la ciudá o la casa onde vivimos, yá nun sirve falar del yo poéticu y burgués, yá nun cuela el poema prosaicu nin la constante imitación d’unos supuestos “clásicos” repetidos, yá cansa l’hiper-realismu figurativu, el coloquialismu irónicu, les cites d’otros autores, la falta d’una orixinalidá romántica.
Na nueva poesía asturiana de los 90 hai un cambiu cincable. Hai una vuelta al paisaxe, a los escenarios míticos, a una tendencia a fuxir del yo poéticu y averáse al nós colectivu, al sentimientu del país o de la sociedá si se quier. Hai una vuelta a un usu más curiáu del estilismu poéticu, alloñándose de los vulgarismos y del cultismu escesivu, escribiendo con más curiáu formal, tanto na métrica como na sonoridá. Hai una vuelta a emponderar los tán maltrataos clásicos asturianos frente al cosmopolitismu dominante nos 80 y a rescatar esi conceptu tán románticu de la orixinalidá. Hai una total llibertá temática lo que incluí l’averamientu a una poesía con mensaxe, reivindicativa ya incluso más asturianista que la de los 80.

Desgraciadamente, la poesía perdió na nuesa sociedá esa misión popular y de remover conciencies qu’ensin dulda tuvo. Dalgunos camienten qu’incluso perdió prestixu y transcendencia social por culpa del excesivu esperimentalismu y esperiencialismu. Nos años de la represión, nos qu’ensin dulda los escritores n’asturianu inda nos atopamos debío a la non reconocencia política del nuesu idioma, la poesía sirvió como función social y lliberadora de conciencies. Esta perda de prestixu de la poesía ye lo verdaderamente grave y peligroso. Hai polo tanto que recuperar el valor social, entendío como colectivo y comunicativu de la poesía pa que vuelva servir d’ariete ideolóxicu p’abrir les conciencies del mundu, como arma pacífica pa vencer tolos temores y torgues, p’ayudar en definitiva a facer una vida meyor col tan famosu y nuesu granín de sable. Hai que rescatar la poesía del rechazu y del olvidu social.
Entiendo polo tanto la poesía como un exerciciu éticu, como una ideoloxía que pretende comunicar, conmover, obligar a tomar partíu, a responder al poeta. Una poesía que incentive y motive non sólo a la lectura de poemes sinón tamién a la escritura, que pretenda ganar adeptos. El conceptu eticista de l’arte poética nun tien por qué renunciar a la estética nin a l’ausencia d’ella, anque ésta nun debiera tomase como exa de la so función. La poesía ética nun respuende a patrones temáticos, nun ye una poesía temática o de materies sinón de valores. Por ello, pretender clasificar a esta perspectiva poética dende parámetros temáticos resultaría un grave erru. Siempre tuviemos avezaos a encasiellar la lírica según la temática argumental que manifieste o esboce. Asina atopamos, destamiente, con poesía amorosa, social, costumista y incluso relixosa, patriótica o intimista.
Considero qu’esencialmente toa poesía ye amorosa, intrínsecamente social, patriótica, vivencial ya intimista. Porque toa poesía faise con ciñu anque nun aluda espresamente a él; porque la poesía ye la más social de les artes y nun me refiero sólo a la poesía oral o tradicional sinón a la de cualisquier tipu; porque el poema nun esiste si nun comunica, si nun sal al esterior y apuerta a los demás; porque escribir o plumiar ye una vieya costume humana; porque la verdadera patria, la que nunca s’abandona hasta la muerte ye la d’esi campu arrecendosu de les nuestres palabres: y porque, en definitiva, toa poesía ye frutu de la esperiencia máxica que supón sentir, vivir, escribir y describir les palabres, los sentimientos o les vivencies qu’estes nos produzan.

Por too ello creo tamién que toa arte poética ye estética porque camiento que lo guapo nun tien qu’identificase esclusivamente cola sonoridá o col ritmu de les palabres, sinón coles palabres mesmes, o más específicamente cola actitú del poeta, una actitú siempre fiel a la tresparencia d’idees, a la claridá na mirada, a la so sinceridá como creador, trés actitúes, en resume, enforma guapes por definición.

Pretendo rescatar la irreverencia que supón güei el fechu de revalorizar la sensibilidá, la maxinación y les sensaciones reflexives, l’espertar de la conciencia del lector, de la lllingua y del País.

Una dulda que per otru llau vien marcando siempre estremancies ente los conceptos y actitúes poétiques ye la que surde énte el fechu de si la estética sirve, si l’actitú ética de lo presentable ye necesaria, si pue ser una ferramienta amañosa y servible pa la creación artística.
La estética, una filosofía típicamente humana, entamada por y pal ser humanu, entiéndola como la ética de lo guapo nel sentíu más asturianu del adxetivu. La estética preséntasenos como un conocimientu perfectamente utilitariu nel sen del usu que se fai de la mesma y del consumu de l’arte púramente estética. Nesti sentíu, les artes más estétiques por esencia como la música o la pintura son utilitaries nel sentíu de que el so consumu y satisfacción depende na mesma proporción de la dosis estilística que manifieste.

Dotramiente, dalgunos pretenden involucrar a la poesía como otra más de les artes estétiques por esencia. Esta corriente, más esteticista qu’estética, desconoz en cierta manera la realidá que conforma el mundu propiu de les palabres, un mundu estéticu daveres y si cabe, embadurnáu de mayor o menos guapura. Pero sobretoo la poesía desllenda un mundu rebosante d’utilidá, de comunicación y conmoción del pensamientu, un paraísu éticu.

Los temes de la poesía ética puen ser dafecho toos. El realismu, la meditación sicolóxica del entornu, l’averamientu a lo real ensin refugar de lo maxinario, de la memoria nin del pasáu más inmediatu y por supuesto ensin esterrar d’esti paraísu al optimismu nin a la sensualidá más asturiana de les palabres. Nun habría tampoco que perder esi afán infantil de querer iguar el mundu, anque esi mundu seya el propiu o l’inventáu. Tampoco quixera escaecer l’usu efectista de les palabres pues atalanto que nun tien por qué contradicir la cenciellez del llinguaxe claro. Pretendo algamar una poética pa lleer pero tamién pa escuchar, cola musicalidá xusta que precisa una espresión fonda, sentida, enraigonada, qu’ennobleza si cabe la sonoridá propia de la llingua astur. Pretendo describir esta poesía na llingua asturiana ensin renunciar a la lexítima traducción al restu les llingües del mundu. Reconozo que baxo toa aparente naturalidá del discursu poéticu remanez una estética de les palabres minuciosamente calculada, ensin mayores concesiones a ella que les necesaries pa comprender el posicionamientu del escritor cara la so obra.

Ufierto esta poesía ética llena dafecho d’intencionalidá. Penriba de too considérola una poesía habitable, totalmente sincera y con un constante y rotundu referente moral. Una poesía fiel y radicalmente comprometida col so propiu testimoniu.